Jop u Donbok Pariong ha ka District Level Quiz halor “Ka Jingkyrduh Pisa 2023” ha Mawkyrwat

Mawkyrwat, Jylliew 07: Ka Reserve Bank of India (RBI) Shillong mynta ka sngi ka la pynlong ïa ka District Level Quiz halor “Ka jingkyrduh Pisa 2023” na ka bynta ki skul sorkar ha kaba la pynlong ha ka Auditorium Hall jong ka Maharam Higher Secondary School, Mawkyrwat ha ka jingïadonlang ka kong S. Kharsahnoh, District School Education Officer, South West Khasi Hills District, Mawkyrwat.
Ïa kane ka jingïakop kaba la pynlong da ka jingthmu ban pynkup bor ïa ki khynnah skul bad ïa ki briew jong ka dong ka thaiñ ha ka ban pynsaphriang ïa ka rukom pyndonkam ïa ka pisa ha kaba la ïa shimbynta da kumba 6 tylli ki skul sorkar kiba don ha ka distrik ha kaba uba jop un ïoh ban ïakhun ha ka State level bad lada u jop nangne u lah ban poi sha ka Regional bad wat haduh ka National Level.
Ïa kane ka jingïakop-kyntip la pynïaid da ka Sharmistha, Manager jong ka Reserve Bank of India bad u Abhijit, Assistant Manager hong ka RBI, Shillong.
U Donbok Pariong u khynnah Class VIII jong ka Mawsaw Government Upper Primary School uba la ïoh 35 poiñ u la ïoh ïa ka nam nongjop bad un sa leit mihkhmat ïa ka distrik ha ka State Level. U nongjop u la ïoh ban khur ïa ka khusnam ryngkat ka song pisa kaba 10/- hajar tyngka.