Shillong, Nailur: U Ashish Samarpit na ka Indian Institute of Management (IIM), Shillong u la long u nongjop ha ka jingïakop ha ka Cluster 24 Finals jong ka ‘Tata Crucible Campus Quiz 2023,’ kaba long ka lympung ïalehkai quiz ha kaba ïadei bad ka khaïi pateng ne jingkyntip kaba heh tam ha ka ri India.
Ha ka lympung ïakhun final jong ka thaiñ shatei lammihngi (Northeast) ïa kaba la tip kum ka ‘North East region Cluster 24 Final,’ la sakhi ïa ka jingïakhun kaba ïakhaid bha na ki nongïashim bynta ha kaba u nongjop u la ïoh ban khur ïa ka khusnam kaba da ka pisa kaba long T. 35,000, bad ïoh ban rung sa sha ka lympung jingialang jong ka Zonal Finals, katba U Rohan Kumar Sinha na Indian Institute of Management (IIM), Shillong u la long u ba wan ba ar bad ïoh T.18,000.
Ka Campus Quiz mynta u snem la phiah ïa ka jingïakhun ha ka ri ha ki 24 tylli ki bynta ne ki cluster, ha kaba ki 12 ngut ki nongïashim bynta kiba ïoh rung sha ka final ki la shah jied ban ïoh ïa ka ‘Wild Card Final.’ Napdeng kine 6 ngut kin ïakhun final ha ka 24 online Cluster Final.
Shuh shuh ïa kine ki 24 tylli ki cluster la phiah shuh ruh sa sha ki saw tylli ki zones, bad man la ki zone kin don hynriew tylli ki clister. Ia ka Zonal Final la pynlong da ka pynleh lyngba ka online.
Ha ka National Finals yn sa don 8 ngut ki nongïakhun kiba ïoh rung sha ka final, bad kiban ïaknieh ïa ka nam ‘National Champion,’ bad kiban ïoh ïa ka song pisa kaba long T.2.5 lak tyngka ryngkat bad ka khusnam ‘Tata Crucible Trophy.’
U nongjop ha ka lympung jong ka National bad ar ngut kiba ïoh heh point kin ïoh ruh ban trei shipor ne internship ha ka Tata Group. U Giri Balasubramaniam, ba baroh ki ju tip kum U ‘Pickbrain’, uba long u quizmaster ne u nongkylli jingkylli ba paw bad uba long ruh u nongpyniaid ha kane ka wat, ïa kaba yn ïa don lang ruh ka Rashmi Furtado.
