Shillong, Kyllalyngkot 17: Ka Rangdajied United FC ka la bteng ban pynneh pynsah ïa ka rukom ïalehkai ba paka jong ka ha ka lympung OC Blue Shillong Premier League 2024 da kaba pynliem suk ïa ka Langsning FC da 3-0 kol hynne ka sngi Thodieng ha madan First Ground – SSA Stadium, Polo.
Kiba la pynkhihjar ha kane ka jingïalehkai ki long u Owanijuh Pajuh (19’, 56’) bad u Aenam Jyrwa (62’) ha kaba ka Rangdajied mynta ka la nang pynjlan ïa ka jingïaid lynti jong ka khlem ka nam rem sha ka hynñiew sien ïalehkai; nalor kane ka kynhun ka la lah ruh ban pyndep ïa ki jingïakhun khlem da shah thep (clean sheet) ha kawei pa kawei na kine ki jingïalehkai.
Da kane ka namjop ka RUFC ka la pynkut ïa ka wat ïakhun ba nyngkong (1st leg) da kaba jop hynriew sien, ïakhaid shisien bad shah rem arsien na bynta ban ïoh kamai 19 poiñ.
Kane ka jingïapher ha ka bynta ba nyngkong ka dei namar ba ka la mad ïa ka nam rem ha ki ar tylli ki jingïalehkai ba nyngkong jong ka pyrshah ïa ki klob kiba don ha ka kyrdan ba hakhmat duh jong ka miej – ka Mawlai SC bad ka Shillong Lajong FC.
Katba ka Langsning, ha kawei pat ka liang, ka dang shu lait na ka thup shah sloit (relegation zone) ka la kamai 7 poiñ. Ha ka wat ïakhun ba nyngkong la sakhi ba ki la jop tang ar sien, ïakhaid shi sien bad shah rem hynriew sien. Ki don ka jingïapher kol kaba kham sniew haba ïanujor bad kaba kynhun ba don ha ka kyrdan ba 9 – ka Nongthymmai SC (-10 to -6), kaba ïaryngkat ruh da 7 poiñ.
Haba phai sha ka jingïalehkai, la ïoh ban sakhi ïa ka kol ba nyngkong jong u Owanijuh kaba u la thep da ka kjat kadiang bad kaba ar ka la wan lyngba ka jingrah bol kaba kyndit kyndit shakhmat shuwa ba un pyrshang sha kol kaba la rung jlang.
Khyndiat minit hadien kane la skahi ïa ka kol na u Aenam kaba la thep nabar ka phyllaw kol.
Ha kawei pat ka tduh, u Manbhalang Nongmin u la pynbor ïa u rangapkol ka Rangadjied – Kerichard L Marshillong ban ïada ïa ka bol ha ka khyllipmat shuwa ban kut ka kylla step. Ka Langsning ka la ïoh ruh katto katne ki kabu ha ka kylla miet hynrei tang kawei kaba la jan urlong, lyngba ka free kick jong u Dajiedlang Wanshnong kaba la shah khanglad biang ha u Kerichard.
Hadien nangta u Rajat Paul (rangapkol ka Langsning) u la kyntait ïa ka jingpyrshang thep kol jong u Owanijuh u ba khmih lynti ban kynjoh ïa ka hat-trick, da kaba knew ïa ki kti jong u kaba la pynkiar ïa ka bol sharud, bad u Ronney Chel Khongrangjem u la kynjat ïa ka bol sha jngai shuwa ba kan lah ban ïaid lait ïa u laiñ kol.
Ka jingïalehkai kaba bud kan long la sngi Nyngkong hapdeng ka Shillong Lajong bad ka Nongthymmai ha ka por 2 shiteng mynsngi ha SSA Stadium, Polo.
