Jop ki Tymmen Basan & Rangbah Balang ïa ki Pastor ha ka ‘Jubilee Charity Football Match’

Mawkyrwat, Lber, 19: Ka Bible Society of India jong ka Mawkyrwat Branch (BSIMB) mynta ka sngi ka 18 tarik u Lber, 2023 ka la ïoh ban pynlong ïa ka lympung jingïalehkai kynjatbol ba la tip kum ka “Charity Football Match” kaba la long hapdeng ki Pastor bad ki Tymmen Basan-Rangbah Balang ha kaba kane ka jingïalehkai ka long kum shibynta ban rakhe ïa ka jubili ksiar bad ruh na ka bynta ban pynmih pisa ban tei ïa ka ïing jong ka Bible Society of India, Mawkyrwat Branch.
Ka jingïalehkai ha ka sngi ka la long shisha kaba i tynnad bad shongshit bha kaba la pynshoh biej ruh ïa ki paidbah nongwa peit kai. Hapdeng jong ka jingïalehkai jong ki Pastor bad Tymmen Basan, ïa ka nam jop la rah da ka kynhun jong ki Tymmen Basan ha kaba ki la ban thep da 3 – 2 kol.
Ïa katei ka jingïalehkai mynta ka sngi la pynlong ha Madan Saitsnad, Mawlangwir, South west Khasi Hills District ha kaba u bah Renikton Lyngdoh Tongkhar u MLA jong ka Mawkyrwat Constituency u la long kum u kongsan bad u bah Carnes Sohshang, MDC jong ka Mawkyrwat Constituency kum u symbud kongsan ha ryngkat da ka jingïadonlang ruh ki Pastor, ki Rangbah Balang bad da ki spah ngut ki paidbah kiba la wan ban sakhi lang ha kane ka sngi.
Lah ban kdew khyndiat ba ka Bible Society of India jong ka Mawkyrwat Branch ka la ïoh ban sdang nyngkong ha u snem 1972 bad mynta u snem 2023 ka la kynjoh ïa ka karta ba 50 snem ha ka jingïaid lynti jong ka, namarkata, kum ka BSI jong ka Mawkyrwat Branch ka la pynlong khnang ïa kane ka lympung ïalehkai kynjatbol hapdeng ki Tymmen Basan & Rangbah Balang pyrshah ïa ki Pastor da kaba buh ruh ïa ki Donation Box kum ka dak ban pynmih pisa na ka bynta shna ïa ka ïing jong ka BSI Mawkyrwat Branch ha Mawkyrwat ba kan long ka jingsah kynmaw ïa ka sngi bad ïa u snem jong ka jingrakhe ia ka jubili ksiar jong Branch.
Haba ai jingkren ha ka jingïalang ba lyngkot na ka liang u bah Renikton Lyngdoh Tongkhar, MLA jong ka Mawkyrwat Constituency uba long kum u kongsan bad u bah Carnes Sohshang, MDC jong ka Mawkyrwat Constituency kum u symbud kongsan ki la ai mynsiem shibun ïa ki Pastor, ki Rangbah Balang bad ïa baroh ki dkhot kiba dei jong ka Bible Society of India jong ka Mawkyrwat Branch ba ki la lah ban pyntyllun ïa ki kam na ka bynta ka kam shakri ïa U Blei bad kumjuh ruh ban pynsaphraing ïa ka khubor jong ka jingpynmim jong U Blei ha kylleng ki jaka ban pynsngewthuh katkum ka jingngeit ki khun Khristan kiba ngeit katba kum ka Ktien U Blei ne ka Bible khamtam ïa ha kito ki bym pat tip shaphang ka ktien u Blei ba im.
“Ngeit skhem ba kine kiei kiei baroh ki jingthmu kin long kiba seisoh khnang ban pynurlong ïa ka jingthmu jong ka Bible Society of India jong ka Mawkyrwat Branch”, ki la ong.