Mawkyrwat, Rymphang 03 : Ka lympung ïalehkai phutbol jong ka Mawlangwir Sports Club ba la tip kum ka Mawlangwir Football Community Shield 2022-23, mynta ka kynti, ka la jam sha ka quarterfinal. Ka quarterfinal kaba nyngkong ka la sdang mynta ka sngi, ka 3 tarik u Rymphang, 2023, ha ka ba ka Se Lajong FT ka la ïa ai reng pyrshah ïa ka Iawpaw FC. Ka jingïalehkai hapdeng kitei ki kynhun ka la long ka ba shongshit bad itynnad bha ha kaba baroh ar ki la ïa khun tyngeh ban thep ïa ki kol. Ynda la dei ka kylla miet, ka Se Lajong ka la ïoh ban pynkhih jar. Ka Iawpaw FC ka la ïakhun tyngeh ban ïoh pynphai hynrei kam shym la lah shuh ban leh kumta. Kumta ka Se Lajong ka la jop noh ïa ka Ïawpaw FC da 1 la 0 bad ïoh ban rung syndon sha ka Semifinal.
Kum ban shu pynkynmaw, kane ka lympung ka la sdang da ka Round of 16 naduh u bnai Nohprah jong ka snem 2022 bad ka la kut ha u Kyllalyngkot 2023, ha ka ba 16 tylli ki kynhun ïalehkai ki la ïa knieh ban rung sha ka quarterfinal. Nalor kitei ki kynhun kiba la kdew haneng, kiwei pat kiba la rung sha ka quarterfinal ki dei ka ka Azriel SC (EKHD), ka Khliehmawlieh YC (WKHD), ka Iamonlang FC (WKHD), ka Lamare SC (EKHD), ka Pay For Right FA (EKHD) bad ka Nongbri Brothers FC (SWKHD).
Ka jingïalehkai quarterfinal ka ba ar kan long ha ka 11 tarik u Rymphang 2023 hapdeng ka Azriel SC pyrshah ïa ka Khliehmawlieh YC ha ka por 1:30 nohphaisngi ha Madan Saitsnad, Mawlangwir. Kumta ka MSC ka khot ka wer ïa ki paid riewieit phutbol jong ka dong ka thaiñ baroh kawei ba kin wan ban sakhi ïa ki jingïalehkai.
Shuh shuh, ka MSC lyngba kane ka kyrwoh ka sngewbha eh ban kitbok kitrwiang ïa ki lai ngut ki samla napoh ka shnong Mawlangwir, kita, u Donbok Elson Marweiñ, u Luckystar Marweiñ bad u Deibanshanbor Mylliem kiba dei napdeng kiba la shah jied ban mihkhmat ïa ka kynhun ïalehkai softball jong jylla sha ka jingïalehkai 44th Senior National Softball Championship 2023 ka ban sa long ha Odisha. Ka MSC ka kitbok kitrwiang ruh ïa ka kynhun ïalehkai softball ka jylla ba kan ïalehkai bha bad jop ïa ki jingïalehkai baroh ha katei ka lympung bad ban wanrah burom ïa ka jylla.
