Shillong, Nailur 03 : Ka Mylliem Lum bad ka Nongkrem ki la ïoh ban khur ïa ka nam jop ha ka jingïakhun hynne ka sngi ha ka lympung ïalehkai jong ka SSA 2nd Division kaba long ha Madan SSA Polo. Haba phai sha ka jingïakhun kaba nyngkong ka Mylliem Lum ka la ïoh ban pynliem da 3-0 kol ïa ka kynhun ïalehkai jong ka PFR ha kaba ïa kine ki kol la ïoh ban thep da u Balan Mawlong ha ka minit kaba 8 bad ka minit kaba 81 bad ïa kawei pat ka kol la ïoh ban thep da u Rapborlang Jana ha ka minit kaba 88 jong ka kylla miet.
Ha ka jingïakhun kaba ar pat, ka Nongkrem ka la ïoh ban pynliem noh ïa ka Jongksha da 4-3 kol.
Ïa ki kol jong ka Jongksha ha kane ka sngi la ïoh ban thep da u Donbok Lyngdoh ha ka minit kaba 37 bad 64 katba ïa kawei pat ka kol la ïoh ban thep da u Basuk Bina ha ka minit kaba 45. Haba phai pat sha ka Nongkrem ïa ki kol jong ka ha kane ka janmiet la ïoh ban thep da u Jefferson Pakyntein ha ka minit kaba 26 bad u Banlum Kharsyntiew ha ka minit kaba 90+1 kaba dei ruh ka kol jop na ka bynta ka kynhun ha kane ka sngi.
Ka jingïakhun ha kane ka sngi Balang kan long hapdeng ka Laitkyrhong pyrshah ïa ka Imson SC ha ka por 12:30 baje mynsngi ha madan SSA bad ha ka jingïakhun kaba ar pat kan long hapdeng ka Marbisu SC pyrshah ïa ka Laitlyngkot SC ha ka por 3:30 baje janmiet ha madan SSA.
