Jop ka MLP FT bad ka Smit ha ka SSA Second Division 2024
Khyrwit hat trick u Pynshailang Lyngkhoi
SHILLONG, Nailur 13: Ka MLP FT ka la lah ban khur da kaba suk ïa ki lai point hadien ba ka la pynjemkhnap ïa ka Imson SC haduh 8 kol ha ka lympung ïalehkai Second Division League 2024 jong ka Shillong Sports Association ha ka Sngi Thohdieng (13.09.2024) ha SSA Ground, Polo. Kawei pat ka kynhun kaba la khur namjop ha kane ka sngi dei ka Smit SC.
U namtam ha ka jingïalehkai hapdeng ka Imson SC bad ka MLP FT ka la leit sha u Pynshailang Lyngkhoi u ba la khyrwit syndon da ka hat trick (36, 64 bad 70 minit) kaba la ïarap ïa ka MLP ban jop kput haduh 8 kol.
Kiwei pat ki kol la thep da u Aldrin M Ramsiej u ba la pynkhihjar ar sien (11 bad 59 minit), nangta u Everestarly Rynjah (5 minit), u Banraplang Mawphlang (45minit) bad u Chesterfield Nongdhar (61 minit) ki la ïoh ban thep mar kawei ka kol.
Ha ka jingïakhun kaba ar, la sakhi ïa ka Smit SC kaba la jop salit da tang shi kol ïa ka Laitkyrhong SC. Kane ka namtam la thep da u Damewanshan Nengnong ha ka khyllipmat shuwa ban kut ka kylla step (45+1min).
Ki jingïalehkai mynta ka sngi kan long ha ka kyrdan Third Division 2024 (14.09.2024), ha kaba ka jingïalehkai kaba nyngkong kan sdang ha ka por 12:30 baje mynsngi hapdeng ka Mawpat SC pyrshah ïa ka Umlyngka SC, nangta kaba bud ha ka por 3:30 baje nohphaisngi hapdeng ka Gorkha Association bad ka Mawkriah West SC. Baroh ar tylli ki jingïakhun kin long ha SSA Ground, Polo.