New Delhi, Nailar 2023 : U Myntri Rangbah Duh jongka ri, u Narendra Modi u la ïashim bynta lang bad ka kynhun ISRO lyngba ka Video Conferencing ban peit ïa ka jinghiar jong ka Chandrayaan 3 ha ka sla khyndew jong u bnai mynta ka sngi. Mar syn hiar ka Chandrayaan 3, u Myntri Rangbah Duh u la ai jingkren ïa kane ka kynhun bad u la kitbok kitrwiang ïa ki na ka bynta kane ka jingjop kaba kyrpang.
U Myntri Rangbah Duh ha ka jingkren ïa ka kynhun kum kiba haïing jong u, u la ong ba kum kine ki por kiba kyrpang ki sah shirta ha ka jingmut jingpyrkhat jong ka ri. “Kane ka por ka dei ka bym lah ban klet, ka bym pat ju jia. Ka dei ka por jong ka jingkhot jong ka ‘Viksit Bharat’, ka jingjop jong ka India, ka dei ka por jong ka jingjam ïa ki jingjynjar bad ka jingïaid ha ka ‘Chandrapath’ jong ka jingjop. Kane ka dei ka por jong ka jinglah treikam jong 140 klur ngut ki briew bad ka jingskhem jingmut jong ka bor ba thymmai jong ka India. Kane ka dei ka por jong ka jingkhie ka jingriewspah jong ka India,” la ong u Myntri Rangbah Duh ïa ka ri baroh kawei. “Ha ka jingshai ba nyngkong jong ka ‘Amrit Kaal’, kane ka dei ka ‘Amrit Varsha’ jong ka jingjop” u Myntri Rangbah Duh uba dap da ka jingkmen u la ong. U Myntri Rangbah Duh u la pynkynmaw ïa ki ktien jong ki stad science da kaba ong “Ka India mynta ka don ha u bnai!” U la ong ba ngi la ïohi ïa ka jingher kaba nyngkong jong ka India kaba thymmai.
U Myntri Rangbah Duh u la ong ba mynta u don ha Johannesburg ban ïashim bynta ha ka BRICS Summit hynrei ki jingmut jingpyrkhat jong u ki don ha ka Chandrayaan 3 kumba long baroh ki briew jong ka India. U la ong ba baroh ki briew jong ka India ki rakhe ïa kane ka sngi. U Myntri Rangbah Duh u la kitbok kitrwiang ïa ka kynhun Chandrayaan, ISRO bad baroh ki stad science jong ka ri kiba la trei shitom da ki snem bad u la kitbok kitrwiang ruh ïa ki 140 klur ngut ki briew jong ka ri ha kane ka sngi kaba dap da ka jingkmen!
“Ka India ka la poi sha ka South Pole jong u bnai kaba kiwei kiwei ki ri kim lah ban poi bad kane ka long namar ka jingtrei shitom bad ka jingtbit jong ki stad science jong ngi,” la ong u Myntri Rangbah Duh. U la ong ba baroh ki khana tynrai shaphang u bnai mynta kin kylla bad ba kine ki khana mynta kin don ka jingmut kaba thymmai. U la kren shaphang ka khana tynrai jong ka India kaba ong ba ïa ka pyrthei la kheiñ kum ka ‘Maa’ bad ïa u bnai la kheiñ kum u ‘Mama’ bad u la ong ba ka don ka jingsngew ba u bnai u long uba jngai bad ba ki briew ki ju ong ‘Chanda Mama dur ke’, hynrei shen ki khynnah kin sa ong ‘Chanda Mama ek tour ke’ lane u bnai u long tang katto katne ka jingjngai.
Ha ka jingkren ïa ki briew jong ka pyrthei, u Myntri Rangbah Duh u la ong, “Ka jingjop jong ka India ha kane ka kam kam dei ka jingjop tang jong ka India. Une u dei u snem ba ka
pyrthei ka ïohi ïa ka G-20 presidency jong ka India. Ka rukom treikam jong ngi halor ka nongrim ‘Kawei ka Pyrthei, Kawei ka Longïing, Kawei ka Lawei’ ka dei kaba sawa ha kylleng ka pyrthei. Ka moon mission jong ngi ruh ka don ha ka nongrim jong kane ka juh ka rukom treikam na ka bynta ka bha ka miat jong baroh ki briew. Kumta, ka jingjop ka dei jong baroh ki briew. Ka India kan ïarap ïa ki moon mission jong kiwei kiwei ki ri ha ki por ban wan,” la ong u Modi. “Nga ngeit skhem ba baroh ki ri ha ka pyrthei ba kynthup ruh ïa ki ri na ka thaiñ shathie jong ka pyrthei ki lah ban leh ïa kum kine ki kam. Baroh ngi lah ban don jingthmu ban poi sha u bnai bad kham sha jngai.”
U Myntri Rangbah Duh u la ong ba u ngeit skhem ba ki jingjop jong ka Chandrayaan Maha Abhiyan kin rah ïa ka jingher jong ka India sha palat u bnai. “Ngin peit ïa ki jaka ba jngai tam jong ka solar system, bad ngin trei ban pynurlong ïa ki lad jong ka universe na ka bynta ki briew,” la ong u Modi. U Myntri Rangbah Duh u la kren shaphang ka jingbuh ïa ki thong kiba heh ha ki por ban wan bad u la ïathuh ba ka ISRO shen kan sdang ïa ka ‘Aditya L-1’ mission ban peit bniah ïa ka sngi. U la ong ruh ba u Venus u long kiwei na ki thong jong ka ISRO. “Ka India ka pyni man ka por ba ka suinbneng kam long u pud,” la ong u Myntri Rangbah Duh da kaba kdew sha ka Mission Gaganyaan ha kaba ka India ka la khreh ban phah ïa ki briew ha ka jingpynher liengsuiñ sha ka haw haw.
U Myntri Rangbah Duh u la ong ba ka science bad teknoloji ki long ka nongrim jong ka lawei kaba phyrnai jong ka ri. U la ong ba kane ka sngi kan ai mynsiem ïa baroh ba ngin ïaid sha kane ka lawei bad kan ïalam lynti sha ka jingpynurlong ïa ki jingthmu.
“Kane ka sngi ka dei ka dak jong ka jingïoh ïa ka jingjop na ki jinghikai ba wan hadien ba la shahrem,” la ong u Myntri Rangbah Duh da kaba kitbok kitrwiang ïa ki stad science ha baroh ki kam jong ki ha ki por ban wan.
