SHILLONG, Nailur 16: Ki ar tylli ki jingïakhun ka lympung Third Division 2024 jong ka Shillong Sports Association ha SSA Ground, Polo, hapdeng ki kynhun na ka Group A bad C, ki la jam sha kaba kut ha kaba ka Lawmali bad ka Mawryngkneng ki la khur pura ïa ki lai point hadien ka namjop.
Ha ka jingïakhun na ka Group-C, ka Lawmali SC ka la pynliem ïa ka Umpling SC da 3-1 kol, katba na ka Group A, ka Mawryngkneng SC ka la pynliem da 5-2 kol ïa ka Lapalang SC.
Ka jingïakhun kaba nyngkong la sakhi ïa ka Lawmali kaba la lamkhmat nyngkong lyngba ka kol na u Richmond Buam tang hadien 4 minit ba la ïaid ka por, hynrei u Busel lynchiang (23 minit) u la pynïakhaid na bynta ka Umpling.
Shuwa ban kut ka kylla step u Dameshwa Malngiang (41 minit) u la pynkhih ïa ka kol kaba ar na bynta ka Lawmali ban ïoh lamkhmat ïa ka jingïalehkai ha ka kylla step. Ka kol kaba lai ka la wan na u Arki Paia Tariang ha ka minit ba 90, kaba la pynthikna shi syndon ïa ka kynhun ban khur ïa ki lai point.
Ka jingïakhun kaba itynnat ka dei hapdeng ka Mawryngkneng SC bad ka Lapalang SC na ka thup jong ka Group-A. Ka Mawryngkneng ka la jop da 5 – 2 kol.
Na ka Mawryngkneng la pynkhihjar da u Banker Mynsong uba la khyrwit hat trick (27, 36 bad 65 minit), nangta u Wanbha War (54 minit) bad u Baehbok Sari (67minit) ki la ïoh ban thep mar kawei. Ki ar kol na bynta ka Lapalang la thep da u Sonjalen Haokip (18 minit) bad u Alex Kharkrang (59 minit).
Ki jingïalehkai ka SSA 3rd DIVISION 2024 ha kane ka Sngi Hat Majai (17.09.2024), ha ka por 12:30 baje mynsngi ka Lamlynti FC kan aireng pyrshah ïa ka Sanmer SC, nangta ka jingïakhun ha ka por 3:30 baje nohphaisngi kan long hapdeng ka Kharang SC pyrshah ïa ka Pomlakrai SC. Baroh ar tylli ki jingïakhun yn pynlong ha SSA Ground, Polo.
