Jowai, Naiwieng 15: Ka jingïalehkai phutbol haka kyrdan Super Division Football Tournament 2023 bala ai kyrteng ‘U Kiang Nangbah Memorial Trophy 2023’ ïa kaba la pynïaid da ka West Jaiñtia District Sports Association, (WJDSA) Jowai hynne ka sngi Balang ha madan Kiang Nangbah Stadium, Dongmihsngi Jowai.
Haba phai sha ka jingïakhun na ka liang ka kynhun ïalehkai jong ka Ladthadlaboh kala khur namjop hadien ba ka la pynliem salit da 1-0 kol ïa ka 7 Wasa United.
Haba phai sha ka jingïakhun, baroh ar kynhun ki la ïakhun tyngeh ban ïoh pynkhihjar hynrei haduh kaba kut ka por jong ka kylla step ym shym la don ba lah ban thep.
Wat hadien ba la bteng ïa ka jingïakhun ha ka kylla miet, ka jingbym lah ban pynkhihjar ka la neh shi slem dei tad ynda la jam sha ka 82 minit ba ka Ladthadlaboh ka la ïoh ban thep ïa ka shi kol na u Buromlangki Salahe kaba la biang pura ïa ka kynhun ban khur ïa ka namjop.
La pyntip ba ka jingïakhun mynta ka sngi 16.11.2023 kan long hapdeng ka Sailung Ialong pyrshah ïa ka Shangpung Lumiawmushai haka por 1 baje shiteng nohphai sngi.
