Shillong, Kyllalyngkot 11: Ka Jersey king bad ka Lawsohtun ki la khur jingjop ha ki ar tylli ki jingïalehkai ka lympung Shillong Cricket League 2nd Division 2024-25 ba la pynïaid da ka Shillong Cricket Association ha ka jingïatreilang bad ka Samkhamti ha madan Urkaliar, hynne ka sngi Saitjaiñ.
Ka jingïakhun kaba nyngkong hapdeng ka Occult CC bad ka Jersey king, ka toss la jop da ka Occult bad ka jied ban tied nyngkong. Ha ka inning tied ka Occult ka la kamai 97 ron bad hap baroh 10 wiket tang naki 19.3. over. U Rohit (23 ron naki 30 bol) bad u Augsten (20 ron naki 21 bol) ki dei kiba la kamai bun ron ïa ka kynhun.
Katba na ki rangkawangbol ka liang pyrshah u Vishal u la long u namtam da kaba khur 5 wiket naki 4 over bad shah tied tang 24 ron, katba u Sanjeev u la khur 2 wiket naki 4 over bad shah tied tang 5 ron.
Haba jubab ka Jersey ka la pyndep ban kynjoh 98 ron tang hapoh 14.5 over, bad hap tang 7 wiket. U Vijay u la kamai 39 ron naki 26 bol, nangta u Vijay Thapa u la kamai 13 ron naki 03 bol, kaba la ïarap ïa ka Jersey king ban jop da 3 wiket.
ïa ka nam Player of the match la khur da u Vishal u ba la kamai 9 ron naki 7 bol ha ka tied bad khur 5 wiket ha ka bol.
Ka jingïalehkai kaba bud, hapdeng ka Cluster CC pyrshah ïa ka Lawsohtun. Ka toss la jop da ka Lawsohtun bad jied ban tied nyngkong ha kaba ka la lah ba kan kamai 127 ron bad hap baroh 10 wiket hapoh ka 19.4.over.
U Andrew u la kamai 36 ron naki 29 bol, nangta u Kynsai u la kamai 17 ron naki 19 bol. Ki rangkawangbol ka liang pyrshah kiba seisoh ki long u Basant (4 over: shah tied 12 ron: khur 3 wiket) bad u Rahul (3.4 over: shah tied 20 ron: khur 2 wiket).
Haba jubab ka Cluster ka la ïohlad ban kynjoh tang 120/10 wicket naki 16.3 over, ban shah rem da 7 ron. U Rahul (58 ron naki 35 bol) bad u Kasim (26 ron naki 26 bol) ki long kiba la kamai bun ron ïa ka kynhun.
U Andrew u la ïoh ban khur 3 wiket naki 3 over bad shah tied tang 19 ron, u Piter u la khur 3 wiket naki 3 over bad shah tied 21 ron.
ïa ka nam Player of the match ha kane ka jingïakhun la khur da u Andrew u ba la kamai 37 ron ha ka tied bad khur 3 wiket ha ka bol.
