Mawkyrwat, K’lyngkot 31: Kum shibynta jong ka jingrakhe ïa ka International Water Conclave 2024, ha ka sngi Balang la pynlong ïa ka District Level Painting Competition (DLPC) 2024 halor ka phang pdeng, “Water, Life and Future” kaba la long hapoh ka Hall jong ka Maharam Government Higher Secondary School, Mawkyrwat, South West Khasi Hills District.
Ïa kane ka jingïakop dro jingdro la pynlong da ka ophis jong u Deputy Commissioner jong ka South West Khasi Hills District ryngkat ka jingïatreilang ka Department jong ka Arts & Culture bad ka Water Resource jong ka Jylla Meghalaya, Shillong ha kaba ki nongïashimbynta ki don baroh 37 ngut kata 32 ngut kiba dei na ki khynnah skul bad 5 ngut kiba wan shimet.
Lah ban kdew ruh ba na ki skul kiba la wan ban ïashimbynta ki long na ka Maharam Government Higher Secondary School, Mawkyrwat, ka Nativity Higher Secondary School, Mawkyrwat, ka Modern Academy Higher Secondary School, Rangmaw, ka JNV, South West Khasi Hills District, ka Mawthawpdah Presbyterian Higher Secondary School, ka Little Star Higher Secondary School, Mawkyrwat, ka St. Xavier’s College, Umoid, ka Mawten Secondary School, ka Balang Mawlangwir Girls Secondary School, ka Balang Mawlangwir Higher Secondary School, bad ka Sngap Syiem College, Mawkyrwat.
U Block Development Officer (BDO) ka Mawkyrwat C&RD Block Bah I. Lawrynïang haba kren halor kane ka jingïakop dro dur, u la ong ba ïa ka jingïakop la pynlong kum shibynta jong ka jingrakhe ïa ka International Water Conclave 2024, bad kumjuh ruh ban wanrah ïa ka jingsngewthuh ha ki nongïashimbynta halor ka jingdonkam ban sumar ïa ka um bad ïa ka mariang.
Ym tang kata, u BDO u la pyntip ruh ba ki nongjop ha kane ka District Level Painting Competition kin sa ïoh ruh ka lad ban mih khmat na ka bynta ka distrik ha ka State Level ka ban sa long shen ha Nongbah Shillong ha ka 7 tarik u Rymphang, 2024.
Nalor ki nongïashimbynta, la synrang lang ruh da ki nonghikai jong ki skul bapher bapher ryngkat ki nongtrei hapoh ka ophis u Deputy Commissioner, South West Khasi Hills District.
