Nongstoiñ, Rymphang 08: Ha ka 6 tarik mynta u bnai, ka KSU Nongtrai Sepngi Unit bad ka la ïoh ban pynthymmai ïa ki nongkitkam jong ka ha kaba la jied ïa ki nongkitkam ki ban bah ïa ka lyngkor jong ka seng. Ha ka jingïalang ba la pynïaid da u Samla Banlumlang Nonglang Publicity Secretary KSU West Khasi Hills District Unit, la ïoh jingkren ai mynsiem na U Samla Ulysis Ryntong General Secretary jong ka KSU Mawshynrut Circle, nangta U bah Birbor Rengtem Sordar Shnong jong ka Shnong Langdongdai Secretary jong ka Hima Nonglang.
Kiwei kiba ai jingkren ki long U Samla Armstrong Sohshang President KSU Mawshynrut Circle, Samla Willbest Wanniang Education Cell jong ka KSU West Khasi Hills District Unit, Cleen Shabong Assistant Organising Secretary jong ka KSU Sengkmie bad hakajuh ka por u ba dei ruh U incharge jong ka KSU West Khasi Hills District Unit hi baroh kawei.
Ha katei ka sngi la shim ïa ka bynta ba kongsan kata ban pyntian smai ïa ki dkhot bad ki Nongïalam, da U Samla Spaiñdor Sing Lyngkhoi Office Secretary jong ka KSU Sengkmie. Haba ai jingkren u la kyntu ïa ki Samla ba kin ïai trei bha ïa ka kam ba la bynshet ban long kita ki Nongïada, Nongpynsah bad Nongïaleh khnang ba ki pateng ba wan kin shngaiñ ha ka imlang ka sahlang.
U la ong ba kum ki dkhot ki dei ban long kiba adkar ha ka ïaid ka ieng, namar ki long ki nuksa na bynta ki samla ki ban sah wan. Kum ki dkhot ba shisha jong ka Khasi Students Union ki dei ban long kiba la khreh ban ïaleh ïa kano kano ka thma na bynta ka daw bah ka jaidbynriew.
Ha katei ka sngi nalor u Sordar Shnong la ïadonlang ruh ki Nongïalam jong ka Hima kum la jingsakhi ïa ka sngi. Ki Nongïalam bad ki dkhot na bynta ka Samoi treikam 2024-27 jong Ka KSU Nongtrai Sepngi Unit ki long President Kitdor Riangtem, General secretary Slinglan Mawsor, Vice President Kyntiewbor Nianglang, Assistant Secre-tary Plastar Mawsor, Organising Secretary Kitbok Nianglang, Finance Secretary Sportar Niang-lang, Publicity Secretary Proding Riangtem bad kiwei kiwei.
