Jew slew ki nong Sohra, khlem pynbna District u Conrad
Pynbna tang kum ka Headquarter
Sohra, K’lyngkot 05: Ka Phawer u Aesop ka ong “U lum u suhkhun u kha da u dkhan”. Kane ka la jia ïa ka Sohra Civil Sub Division, haba u Myntri Rangbah um shym la pynbna ïa ka Sohra kum ka District, hynrei u la pynbna tang ka Headquarter jong ka District ka ban sa kha thymmai.
“Nga sngewsih ba nga hap pynsngewsih ïaphi namar ba nga hap ban pynbna ïa ka Sohra tang kum ka Headquarter, namar ba ïa ka District ngi dang ïapynbeit ïa ki jingdonkam khamtam eh ïa u pud bad kiwei pat ki bynta”, la ong u Conrad ïa ki dkhot ka Sohra District Demand Forum, ki Khlieh Nongsynshar bad ka Hima Sohra ha ka jingïalang kaba la long ha Circuit House, Sohra.
`U Conrad u la ong ba ka sorkar ka kwah ba kan mih sa kawei ka District na ka East Khasi Hills da kaba peit lang ïa kiwei pat ki jaka kiba don haduh u laiñ bad ka Sohra, kum ka Mawsynram, ka Pynursla ru ban pynlong ïa ka South East Khasi Hills District. Hynrei u la ong ba lada kine ki jaka kim treh ban wan ruh, ka Sohra kan ïoh beit ïa ka District bad ka Headquarter kan dei beit ha Sohra.
Hynrei kane ka jingpynpaw u Myntri Rangbah, uba la ïakynduh ïa ki dkhot ka Forum bad ki Khlieh Nongsynshar hadien ba la wan na ka jingïalap elekshon ha Sohra, kam shym la pynhun ïa ki paidbah Sohra, kiba bun kiba la ïa ap ha phyllaw jong ka Circuit House bad kiba naduh kine ki sngi baladep ki lakmen bad shongshit bha ban ïoh noh la ka jong ka District hadien sawphew snem na ka Sohra ka la ïaid kum ka Civil Sub Division.
“Ngim hun ïa kaei kaba u Myntri Rangbah u pynbna, namar ngim tip la kata ka District kan wan ne em”, la ong ki paidbah kiba ap da ka jingkmen ha phyllaw Circuit House.
Don ruh kiba la bitar ïa kane ka jingpynpaw u Myntri Rangbah da kaba ong ba kumno ka Sohra District Demand Forum kan shu pyntip ne pynsngew ba yn pynbna District thymmai, lada kam ïoh ïa ka jingkular kaba biang ne kaba thikna na u Myntri Rangbah.
“Ngi la ap da bun kynta kum ka jingburom ïa u Myntri Rangbah ba un pynbna ïa ka Sohra kum ka District, hynrei ka long da khongpong pynban”, la ong sa kiwei pat.
Ha kane ka jingïalang la don lang ruh u Bah Prestone Tynsong, Symbud Myntri Rangbah, uba la ai jingkren tang kumba 45 sekhon ha kane ka jingïalang. Nangta ladon lang ruh i Kong Ampareen Lyngdohkyrtong ka NPP na East Shillong.