Ki paid Khasi kiba shong basah ha khappud jong ka Assam la bunsien ki la wan tied ïa ka jingkhang jong ka Sorkar Jylla haduh tyngkong jong ka Secretariat tang namarba ki lei san snem kiba ju pyrta ieit ri ha ki rynsan ïalap elekshon ki phai lyndet ynda ki la shong ha ki shuki ba jem bad kim shlan satia ban kren ïa kine ki jingeh ba ki paidbah ki mad naduh ba ka Jylla Meghalaya ka la ïoh ïa la ka jong ka Jylla bapura kaba khlem u pud u sam kaba biang.
Toi, ha ka jingsynshar jong ka National Peoples Party (NPP) kaba la lamkhmat ïa ka Sorkar Meghalaya Democratic Alliance ka la khih la ksar ban ïa pynbeit noh ïa u pud u sam bad ka Jylla Assam khnang ba ki paidbah kiba shong basah ha ki shnong khappud kin ym mad shuh ïa ka syrtok bad ka la lanot.
Watla ka Sorkar Meghalaya hapoh ka jingïalam jong u Conrad K. Sangma bad ka Sorkar Assam hapoh ka jingïalam jong u Himata Biswa Sarma ki ladep ïa pynbeit shwa ïa ki hynriew tylli ki jaka ïakajia pud ba kham suk hynrei ki hynriew tylli ki jaka ba ïakajia pud kiba kham jwat ki sahteng namarba ki lei san snem ki dang bunkam elekshon, ki dang bunkam ha ki tamasa ba harrukom kiba wan na uwei u bnai sha uwei pat u bnai.
Lada phai na baroh ki dong jong ka Jylla, kam don satia ïa u pud u sam uba biang. Phai sha Rilum Khasi bad Garo ka jylla ka ïatakhuh bad u pud u sam ka Bangladesh, hangne ruh ki paidbah kiba shong basah ha khappud ki ïakynduh mawsiang namarba ki duh noh ïa ki bri ki bsah ki jaka rep ki jaka riang ba ki ïoh pateng na ki mei tymmen ki kpa tymmen. Ka West Jaiñtia Hills bad ka Ribhoi District ki dei ki ar tylli ki District ha ka Jylla kaba mad jingeh bha na ka jingleh donbor ka Jylla Assam namar ka ïohi ba ka Jylla Meghalaya kam pat ïoh ïa ka jylla bapura. Lada ka Meghalaya ka dei kaba la ïoh ïa ka Jylla bapura kan jin da la don ïa u pud u sam uba biang bad uba pynthikna ba ki khun ki hajar bad ki paidbah nongshong shnong kin ym mad ïa ki jingshah pyndik wat haduh u pud ban kin shah dkhat jubor ka jingim ha ki Pulit ka Sorkar Assam bad ha ki mynder ri Nepali kiba buhai shnong ha ki shnong khappud ka Meghalaya bad Assam. U paidbah nongshong shnong ka Jylla, um pat klet ïa ka jingsynreit kuli da ki pulit Assam ïa ki paidbah ha Iew Langpih, West Khasi Hills District ha kaba saw ngut ki rangbah Khasi ki la duhei ïa la ka jong ka jingim bad ka jingshah dkhat jubor ka jingim jong ki san ngut ki nongshong shnong ka shnong Mukroh ha ki Pulit pahara khlaw jong ka Sorkar Assam kaba la shna bad buh beain ïa ka jaka sah jong ki pulit pahara khlaw hapoh u pud u sam jong ka shnong Mukroh.
Kine ki paidbah kiba shong basah ha ki bynta khappud ki sngewthuh shai ba ka Jylla Meghalaya kam pat ïoh ïa ka Jylla bapura namarba ki ïai shah pyndik laiphewjait ha ka Sorkar Assam ka bym burom satia ïa ka Status Quo ba la ïasoi bad ka Sorkar Meghalaya. Ka jingshah jem bad ka jingaimon ka Sorkar Meghalaya ka pynlong ïa ka Sorkar Assam ban phah pyntieng pynsmiej da ki shipai ki swar ban pynkbum da ki ktang suloi khnang ba ki paidbah Khasi kiba shong ha ki shnong khappud kin kohnguh bad kin pyndem hakhmat ka Sorkar Assam.
Haba phai sha Block-I bad ha Block-II, ki shnong kiba ïatakhuh bad ka Jylla Assam ki mad ïa kajuh ka jingshah pyndik namar ki paid Khasi-Pnar ki la mad teng ïa ka jingkylla phetwir ha la ka jong ka ri tang namarba ki sheptieng ïa ki ktang suloi jong ki Pulit Assam kiba pyntieng pynsmiej ïa ki paidbah thik kum ki lehnoh bad na ka jingshah pyndik sa ha ka Karbi Anglong Autonomous Council (KAAC) kaba shim kabu ban lute im im peit peit na ki nongrep baduk kiba sah ha ka thain khappud
Ka shong eh mynta sa ha ka mon bajwat jong ka Sorkar Meghalaya Democratic Alliance (MDA) hapoh ka jingïalam jong u Conrad K. Sangma hato u lah neem ban loit bad law ïa u sohkyrdot ba ki paidbah ki la mad naduh u snem 1972 ba ka Meghalaya ka la ïoh ïa la ka jong ka jylla.
Ka Sorkar MDA ka dei ban ieng rangbah ban pyneh ïa ka jingthombor jong ka Sorkar Assam namarba ki paidbah kiba sah ha khappud ki long thik kumba im sha ri khlaw namarba kim ïoh ïa ka pule ka puthi kaba bha, ka surok kaba bha, ka umbam umdih kaba biang, ki skhim pynroi kiba biang bad ka sumar ka sukher, ka koit ka khiah kaba pura.
