Jan kot 1600 ngut kiba ïap na u jumai bah ha Myanmar, bun kiba hap thiah ha ki surok

Mandalay, Lber 30 : Ka jingwan kynsan u jumai bah ha ka sngi Thohdieng ka la poi haduh u pud ba ka jingdon kiba ïap ka la jan kot sha ka 1600 ngut.
Kane ka jingjia ka la pynlong ruh ïa ki surok jong ka sor Myanmar ban kylla long pynban kum ka surok kaba lum thup ïa ki met hadien ba ka jingwad ïa ki briew kiba long ki lanot ha kane ka jingjia ka dang ïai bteng haduh kane ka sngi U Blei.
Kumban shu phai dien, une u jumai uba khlain bor haduh 7.7 ha ka ritcher scale u la sdang na Mandalay bad ka jingkhlain jong u ka la pynlong ïa ki jingtei kiba jrong ba jrong ban khyllem lut kynthup wat ïa ka kad liengsuin ruh.
Watla ki bor ai jingïarap ki wan na kylleng hynrei a jingor pait ki surok, ka jingkhyllem ki jingkieng ka la pynthut lut ïa ki lad jingïarap.
Na ka liang ki bor ai jingïarap ki dang ïai bteng tad haduh mynta kynthup ïa ki nongshong shnong khamtam ha kito ki jaka ba ki kor ki bor kiba heh kim lah satia ban poi.
Nalor kane, ka thain ka la mad biang ha kane ka sngi u Blei ïa u jumai uba la pynsyier mynsiem biang ïa ki paidbah watla ka bor jong u ka dei tang 5.1 ha ka ritcher scale.
Kiba bun na ki 1.5 million ngut ki nong shong shnong ka Mandalay ki la hap ban thiah ha ki surok namar kim don iing don sem shuh hadien ba u jumai u la pynjot lut naphang ïa ki iing ki sem jong ki. Ym tang katta, une u jumai u la khyrwit lang ruh ïa ka ri ba marjan ka Thailand da kaba wanrah ïa ka jingïap jong ki 17ngut ki briew.
Ki khubor ki ong ba haduh mynta hi la antad ba ka jingdon ki briew kiba ïap ha Myanmar ka la palat ia ka 1600 ngut bad ka jingdon kiba mynsaw pat ka la kot sha ka 3,000 ngut tam. Tangba nalor kine ki dang don ruh kiba ym pat lap naba ka jingwad ka dang ïai bteng.
Halor kane ka jingjia, na ka liang ka India ruh ka la phah ïa ki lad ai jingïarap ha ka janmiet sngi Saitjain na ka bynta ban ïarap lang haba ïadei bad ki lad ai jingsumar nalor kiwei pat ki lad ai jingïarap.