Jam shaphrang ka Inter-School Basketball Tournament; la sngi Palei yn pynlong ïa ka QF
Shillong, Nailur 13: Ka Inter-School Basketball Tournament kaba dang ïaid shakhmat, ka la jam mynta sha ka sngi ba ar (Day-2), ha kaba ka la sakhi ïa ki jingïalehkai kiba pynkhihwin, ki jingïakhun kaba jur, bad ka jingïalehkai kaba itynnat na ki khynnah samla. Ki hynñiew tylli ki jingïalehkai ha ka sngi Saitjaiñ ki la pyni ïa ka jingtbit, ka jingtreilang, bad ka jingkut jingmut ba ki khynnah samla ki ïakhun ban ïoh ïa ka kyrdan ba halor ha madan ïalehkai.
Ïa kane ka lympung la pynlong da ka DUBAKH Sports Pvt Ltd ha Pearly Dew Higher Secondary School kaba don ha Jaiaw Laitdom.
Ka Mizo Modern HSS ka la sdang ïa kane ka sngi da ka jingjop ha ka Group A, da kaba pynliem ïa ka Jaiaw Presbyterian HSS da 53-39. U G Mawlong jong ka Jaiaw Presbyterian u la kamai 19 point hynrei um shym la lah ban pyllait ïa ka kynhun na ka nam rem. Ki rangïalehkai kiba la noh synñiang borbah ïa ka Mizo Modern ban khur ïa ka jingjop ki long u Pamai (12 pts), ka Lorlmmowia (11 pts) bad u A Das (10 pts). Ha kane kajuh ka Group, ka St Edmund ka la pynliem ïa ka Mawkhar Christian HSS da 39-19.
Haba phai sha ka Group B, u G Kharbuli ula pynshlur ïa ka Little Flower HSS ban khur ïa ka jingjop da kaba kamai 14 poiñ, ban pynliem ïa ka Shillong Public School da 35-10. Nangta ka jingïalehkai kaba bud la ïohi ïa ka Dinet Manik Memorial HSS kaba la pynliem ïa ka Pearly Dew da 36 la 28. Kiba la noh synñiang borbah ïa ka Dinet Manik MHSS ki long u MK Marak (14 point) bad u B Boro (11 pts).
Ka Jaiaw Presbyterian ka la wanphai biang sha ka jingïakhun ban pynliem ïa ka Mawkhar Christian da 46 la 14. U G Umlong u la ïalam ïa ka Jaiaw Presbyterian sha ka jingjop da kaba kamai 22 point, ryngkat ka jingïarap na u B Syiemiong uba la kamai 10 point. Ha ka jingïalehkai kaba hynriew, u G Kharbuli (27 point) bad u D Suting (21) ki la trei shitom bha ha ka jingïalehkai kaba bud na ka bynta Little Flower ban pynliem ïa ka Pearly Dew da 46-27.
Ha ka jingïakhun ba khatduh jong kane ka sngi la sakhi ïa ka Dinet Manik ba ka la jop da 30-14 pyrshah ïa ka Shillong Public School. U MK Marak u la tyngshain biang, ha kaba mynta ka kynti u la kamai 20 poiñ.
Ki 8 tylli ki kynhun kiba ïashim bynta mynta kin rung sha ka wat ïakhun Quarterfinal kaba la buh ban pynlong ha ka sngi Palei.