Jowai, K’Lyngkot 23: Ka Dorbar Shnong Pdengshakap kaba pynïaid ïaka jingïalehkai phutbol jong ka ïa kaba la tip kum ka 9th Secondary School Football Knock-Out Tournament 2022-23, kala sdang ïaka jingïalehkai 2nd round ba nyngkong ha kane ka sngi saitjaiñ bala dep,ha kaba ka Thangbuli Yswc kala lah ban pynliem noh ïaka Nongmadan SC daka jingïashut Tie-Breker.
Hapdeng jong ka jingïalehkai ba ïa biang bor bha ka Thangbuli YSWC tang haka minit kaba 2 kala lah ban thep kol lyngba u Chanmitre Thma hynrei ka Nongmadan SC kala lah ban pynphai kylla lyngba u Embracestar Lyngdoh haka minit kaba 15. Haba ki nongpynïaid kila rah sha ka jingïashut Tie-breker ka Thangbuli YSWC kala jop da 3-0.
Haka jingïalehkai ba ar pat ka Umsalait SC kala lah ban pynliem noh ïaka Nohron SC da 1-0 bad ïa kane ka shi kol jong ka Umsalait SC la thep da u Marbiang Suchiang haka minit ba 49.
Naka liang jong ka Tournament Committee kan bteng biang ïaka jingïalehkai ha kane ka sngi saitjaiñ ban wan kata haka 28 tarik mynta u bnai ha kaba ka jingïalehkai ba nyngkong kan long hapdeng ka Amlanai YB pyrshah ïaka Nonglamin FC haka por 12 baje katba ka Pohplet FC kan ïaleh pyrshah ïaka Nongrah SC (Shillong) haka por 2 baje nohphai sngi.
Sa shisien Tournament Committee ka khot bad wer ïa baroh ki paitbah riewieit phutbol jong ka thaiñ ba kin ïawan sakhi lang ïa kane ka jingïalehkai khnang ba kan long kaba itynnad bad ishongkun.
