Jowai, Nohprah 02: Ka lympung ïalehkai phutbol ha ka kyrdan ‘Super Division Football Tournament– 2025’ ïa kaba la tip kum ka “17 U Kiang Nangbah Memorial Trophy” bala pynïaid da ka West Jaiñtia District Sports Association, (WJDSA) Jowai kaba la long ha ka 02 tarik u Nohprah ha madan Kiang Nangbah Stadium, Dongmihsngi Jowai.
Haba phai sha ka jingïakhun ka Mooknor Thadmuthlong kala pynliem da 2-1 kol ïaka Ladthadlaboh, ïa kitei ki kol na ka Mooknor Thadmuthlong la thep da u Sunidabiang Ymbon haka minit ba 58 bad u Rimiki Suchiang haka minit ba 65. Katba ïa ka shikol na ka Ladthadlaboh la thep da u Siewdorlang Nongtri haka minit ba 48.
Kane la lympung kala jam noh sha ka jingïakhun Semi Final jong ka 1 Qualifier ka ban long haka 5.12.2025 hapdeng ka Khimusniang SC pyrshah ïa ka Demthring SC ha ka por 1 baje nohphai sngi. Ka jingïakhun Semi Final jong ka 2-Eliminator kan long haka 6.12.2025 hapdeng ka Ladthadlaboh pyrshah ïaka Mooknar Thadmuthlong SC.
La pyntip ba ka jingïakhun Semi Final jong ka 3-Eliminator kan long haka 9.12.2025. Katba ka jingïakhun Final kan long haka 13.12.2025.
