Shillong, Lber 10: Ka Reliance Foundation Youth Sports (RFYS), ha ka jingïatreilang bad ka All India Football Federation (AIFF), ka la pynlong ïa ka Women’s Football Referees Workshop ban pyntbit bad ai mynsiem ïa palat 170 ngut ki nongpynïaid jingïalehkai (match official) kynthei ha kylleng ka ri India. Kane ka jingthmu kaba la sdang naduh ka 21 tarik u Rymphang ha Srinagar, ka thmu ban pynroi ïa ka kam referee.
Hadien ka jingpynlong kaba seisoh ha Srinagar (21-22 tarik Rymphang) bad ha Kolkata (1-2 tarik Lber), la ïoh ban wanran ban pynlong ïa kane ka Women’s Football Referees Workshop ha Shillong naduh ka 8 tarik haduh 9 tarik Lber. Ki Workshop kiba dang wan ki long ha Chennai (15-16 tarik u Lber) bad ha Mumbai (19-20 tarik u Lber).
Ka thei ïalehkai phutbol ba la kham rangbah jong ka kynhun ïalehkai phutbol ki kynthei jong ka ri India ka Ngangom Bala Devi, ka la ban jur ïa ka jingdonkam jong kum kine ki jingthmu, da kaba ong, “Ka kam Referee ka dei ka kam kaba eh bha, bad nga don ka jingñiew burom kaba khraw ïa baroh ki nongpynïaid jingïalehkai (match official) kiba pynthikna ïa ka jingïalehkai kaba hok ha ka phutbol India. Kane ka workshop, ba la pynlong da ka Reliance Foundation ha ka jingïatreilang bad ka AIFF, kan ai bor ïa ki ban pynïaid kham man ka por ha ki kyrdan National bad International. Ka long kaba pynsngewtynnad ban ïohi ïa ki jingpyrshang kiba bteng na ka bynta ka jingkiew jong ka phutbol India.”
Ha ka jingïalam jong ki nonghikai kiba tbit jong ka AIFF, ba kynthup ïa ka Uvena Fernandes- ka assistant referee ba marwei jong ka India ban pynïaid ïa ka phainal jong ka FIFA World Cup – ka Maria Rebello, ka kapten barim jong ka kynhun ïalehkai phutbol ki kynthei jong ka ri India bad ka referee ba la shah thup kyrteng ha ka FIFA. bad ka M Joychandra Singh, nangta ki AIFF Zonal Referee Development Officer ha Northeast, kine ki prokram ai jinghikai ki pynkupbor ïa ki match official da ka rukom jingtbit ba kongsan ha ka liang ka jingstad bad ka jingshim rai.
Da ka jingnang kiew jong ka phutbol jong ki kynthei ha India, kumba 40 ngut ki nongpynïaid (match official) kynthei ki la dep ban ïashim bynta ha ki jingïakop jong ka RFYS bad Reliance Foundation Development League (RFDL) mynta ka samoi. Ki Workshop kiba dang ïaid shakhmat ki tei ïa ka jingkular ba la slem jong ka RFYS, kaba la ai jingmyntoi ïa palat 620 ngut ki coach bad ki referee kynthei naduh u snem 2022.
