Shillong, Naiwieng 14: Ka Seng A’chik Conscious Holistically Integrated Krima (ACHIK) ka la thoh sha u Myntri ka tnat Pule Puthi ha kaba ka la ujor halor ka jingjah rngai jong u head teacher ka skul school ha Garo Hills, na ka liang ka seng ka la ujor da kaba ong ba une u nonghikai u la jah mynta la kumba 15 snem eiei bad la kynnoh ruh ba na ka liang jong u haduh mynta u dang ïai bteng ban shim ïa ka tulop jong u.
Na ka liang ka ACHIK ka la kynnoh ba u head teacher, u Poresh Sangma, uba la shah thung hapoh ka Bolchu Katonggre Lower Primary School hynrei u khlem da la trei ïa ka kam mynta la bun bun ki snem. La kynnoh ba baroh ki kam kiba dei ban trei da ma u la hap ban leh da assistant teacher.
Kumta kane ka la wanrah ka jingeh na ka daw jong ka jingbym don u head teacher, ha kaba kane ka la ktah ïa ka kam pule jong ki khynnah skul. Halor kane na ka liang ka seng ka la kyntu ïa ki bor badei peit ban shim khia ban pynbeit ïa kane ka kam.
