Jah klep ka 1 klur ba pyllait ka NABARD sha ki paidbah ka shnong Shakoikuna
Suba ba don ka jyrsieh bamsap ba shyrkhei
Nongpoh, K’Lyngkot 22: Ki paidbah nongshong shnong jong ka shnong Shakhoikuna ha Ri-Bhoi District mynta ka sngi ki la leit ban ujor syndon sha u Deputy Commissioner ka Ri-Bhoi District, hadien ka jingsuba ba ka lah ban don ka jingbam sap kaba shyrkhei na ka jingpyntreikam ïa ka skhim RIDF jong u snem 2021-22 kaba haduh 1 klur tyngka bala mang lyngba ka NABARD.
Katto katne ki nongshong shnong jong ka shnong Shakhoikuna ba kynthup ïa u Bah Barnabas Maring, Bah Gabriel Makri bad u Bah Khil Maring uba dei ruh u Asst. Rangbah shnong jong ka shnong Shakoikuna ki la pynpaw ïa ka jingsngew khia halor ka jingpyntreikam ïa katei ka skhim, hadien ba uwei u riew rangbah u la pan da ka RTI bad paw pyrthei ruh ba lyngba katei ka skhim la dep ban pynlait ruh ïa ka pisa kaba 1 klur tyngka na ka bynta ki kam pynroi ha katei ka shnong, hynrei kaba sngewsih ka long ba katei ka pisa ym shym la pyndonkam ha ka rukom kaba dei.
Shuh shuh lyngba ka RTI la lap ruh ba ïa ka pisa la pynlait sha ki paidbah nongshong shnong kiba la mih kyrteng naduh u bnai Nailar 2022, bad kaba sngew lyngngoh ka long ba ki paidbah kiba la mih kyrteng kim shym la ioh satia ïa ka pisa, bad bun na ki kyrteng bala paw ha ka RTI kim dei satia kiba na ka shnong Shakhoikuna ba kam don satia ka jingithuh na ki nongshong shnong jong katei ka shnong, bad kam shym la don satia ka jingpyndep ïa ka jingpyntreikam ïa katei ka skhim haa katei ka shnong wat hadien bala dep pynlait ïa ka pisa kaba dei ban poi sha ki paidbah.
La pynskhem ruh ïa katei ka jingbym ioh ïa ka pisa wat hadien bala mih kyrteng da ki katto katne ngut ki nongshong shnong kiba kynthup ïa ka Kong Elbina Makri, Bah Jer Maring, Bah Spil Makri bad u Bah Jermel Makri ba ka kyrteng jong ki paw ba ki la ioh pisa lyngba katei ka RTI.
Halor katei ka jingsuba ba ka lah ban don ka jingbam sap kaba shyrkhei na ka liang kitei ki paidbah bad riew rangbah ki la dawa ruh na u DC ka Ri-Bhoi ba u dei ban shimkhia ban pynlong ka jingtohkit halor ka jingpyntreikam ïa katei ka skhim ban lap ruh ka jingshisha shano ka pisa ka rung kaba dei ban poi sha ki paidbah.