Ïuhkjat u Myntri sorkar pdeng ha skulbah USTM, ïaroh ïa ka kiew ka jingshakri ha ka pule puthi

Nongpoh, Ïaïong 03: U Ramdas Bandu Athawale, Myntri khynnah ka sorkar pdeng ba dei peit ïa ka tnad Social Justice and Empowerment u la leit ban ïuhkjat ha ka skulbah University of Science and Technology, Meghalaya ban ïakynduh ruh ïa u Mahbubul Hoque Chancellor, lem bad u Prof. GD Sharma Vice Chancellor ban ïakren halor ka jingshakri katei ka skulbah bad ka jingmyntoi jong ki samla pule ka thaiñ.
Ha katei ka jingleit ïuhkjat u Myntri na ka liang ki bor pynïaid katei ka skul kila pynpaw ruh hakhmat u myntri ïa ki mat ka kongsan bad ki jingshakri jong katei ka skulbah khamtam ha kaba ïadei bad ka pule puthi bad kiwei kiwei kiba la kyntiew ïa ka thaiñ, khamtam ka jingpynkylla dur ïa ka thaiñ Shatei lam Mihngi ka ri India ba wat ki samla pule ba duk ki ïohlad ban pule.
Na ka liang utei u myntri u la ai ka jingïaroh ïa ka jingkiew shaphrang jong katei ka skulbah khamtam ka jingshakri ha ka pule ka puthi namar kumba 20% ki samla kiba pule ha USTM ki dei ki samla kiba duk bad kiba duna ka jingïoh bad kiba bteng ïa ka jingpule jong ki lyngba ka Special Scholarship Scheme, ba ki samla pule baroh kin ïoh ka juh ka lad pule ha ki jingpule ba kham shalor.
U la ong ruh ba ka USTM ka dei ka jingkyrmen ïa ki samla pule ha kane ka juk, naduh ki skul bad ki tnad pule bapher bapher ryngkat ki nonghikai kiba tbit ban long kum kawei na ki shlem ban saiñdur ïa ka lawei jong ki khynnah bad pynpaw ruh ka jingsngewhun halor ka thong jong katei ka skulbah kaba ïaryngkat dor bad ki jingdonkam ki samla.
Kum u myntri sorkar pdeng u la kular ruh ban ai ka jingïatreilang khamtam ïa ki jingthmu jong katei ka skulbah ban kyntiew ïa ki samla pule lyngba ka jingnang jingstad bad ki lad ban pyntbit ïa ki sap jong ki.