ISL Cup: Buh thong ka JFC ban khur ïa ka jingjop kaba nyngkong ha ka playoff pyrshah ïa ka NEUFC

SHILLONG, Lber 27: Ka Jamshedpur FC kan wan sha Jawaharlal Nehru Stadium ha Shillong ha ka 30 tarik mynta u Lber (sngi U Blei) ban aireng pyrshah ïa ka NorthEast United FC na bynta ka jingïalehkai knockout kaba ar jong ka Indian Super League (ISL) 2024-25 Playoffs.
Baroh ar tylli ki kynhun ki la lehbha ha ki jingïalehkai jong ka league. Ka NorthEast United ka la pyndep ïa ka samoi ha ka kyrdan ba saw, da kaba kamai 38 point kiba ka la bynrap naki 10 tylli ki namjop. Ka la jop ïa lai sien naki san tylli ki jingïalehkai ba khatduh ha baroh ki lympung, da kaba pynkhihjar 9 kol bad shah thep tang 4 ha katei ka por.
Ha kawei pat ka liang ka Jamshedpur, ka la pyndep ïa ka samoi ha ka kyrdan ba san ryngkat ki 38 point, da kaba jop 12 sien. Hynrei kane ka kynhun ka la duna bha ha ki jingïalehkai ba dang shen, ha kaba ka la jop tang kawei na ki san tylli ki jingïalehkai ba khatduh bad ka la shah rem lai sien. Ka la shah thep ruh haduh 10 kol ha kitei ki jingïalehkai, ka ban long ka jingeh ïa u manager, Khalid Jamil.
Hynrei kane ka kynhun ban aireng shabar nala ïing, ka bat ïa ka rekod kaba kham bha ha ki jingïalehkai hapdeng jong ki (head-to-head), da kaba jop 7 sien naki 17 tylli ki jingïalehkai hapdeng kine ki arliang mamla. Katba ka NEUFC ka la jop tang saw sien.
Ha ka ISL 2024, ka NEUFC ka la long ka nongjop ha baroh ar tylli ki jingïalehkai ha ka League stage pyrshah ïa ka JFC, da kaba jop 5-0 kol hala ïing bad da 2-0 kol ha Jamshedpur.
Kano kano kaba jop ha kane ka jingïalehkai kan jam shakhmat ban aireng pyrshah ïa ka Mohun Bagan Super Giant ha ka semi-final kaba la pynkhreh ban long ha ki ar tylli ki wat ïakhun (2 leg) ha ka 03 bad 06 tarik ïaïong, ha kaba ka kynhun kaba jop ha katei ka jingïakhun kan ïoh ïa ka jaka sha ka phainal.
U Alaeddine Ajaraie u la don ha ka rukom kaba seisoh bha na bynta ka NorthEast United, bad u la lamkhmat ïa ka thup ki rangïalehkai ba bun kol tam jong ka league da kaba thep haduh 23 kol ha ki 24 tylli ki jingïalehkai. Ha kawei ka liang, ki nongïalehkai jong ka Jamshedpur kim shym la paw bha, ha kaba u rangïalehkai pdeng u Javi Hernandez uba dei u rangïalehkai ba bun kol jong ka klob, u la thep tang 7 tylli naki 23 tylli ki jingïalehkai.