Kolkata, Kyllalyngkot 14 : Ka Jamshedpur FC ka la pynliem da 2-1 kol pyrshah ïa ka East Bengal FC ha ka jingïalehkai jong ka lympung Indian Super League (ISL) 2022-23 ha ka jingïalehkai ha ka janmiet sngi Thohdieng ha Salt Lake Stadium, Kolkata.
Ka Jamshedpur FC ka la pynkut ruh ïa ki shiphew sien ïalehkai da kane ka nam jop kaba nyngkong ha ka jingïalehkai shabar na la ïing.
Ïa kitei ki ar kol la thep da u Harry Sawyer bad u Ritwik Das kaba la ïarap ïa ka kynhun ba kan khur ïa ki lai poiñ.
U Cleiton Silva u la thep nyngkong ïa ka shi kol ha ka jingïalehkai jong ka kylla step bad kadei ka kol kaba khyndai na bynta jong u mynta ka samoi, kaba la pynlong ïa ka East Bengal ban duh rung sha ka playoff mynta ka samoi ha ryngkat ka Bengaluru FC kaba dang ïaknieh rung sha ka playoff bad kaba dang sah sa shisien ïalehkai.
Ka East Bengal FC ha katei ka jingïalehkai ka la pynkyllla ka rukom pynmih madan ha ka thup ki khatwei ngut. U Sarthak Golui u la mih bujli ha ka jaka jong u Jerry Lalrinzuala kum u wing, bad u Suhair VP u la wanphai biang hadien ba u la shha sospon ha ka jingïalehkai kaba khatduh. U Charis Kyriakou u la mih bujli ha ka jaka jong u Jordan O’Doherty bad ïalehkai ha ka bynta ba shapdeng.
Katba ka Jamshedpur FC ka la pynkylla tang arngut, ha kaba u Pratik Chaudhari bad u Boris Singh ki la wanphai biang bad mih bujli ha ka jaka jong u Jay Thomas bad Ishan Pandita.
Ha ka jingïalehkai ba dang ïaid 12 minit, u Alex Lima u la ïoh ban khyrwit ïa ka bol kaba la leit dei noh ïa u dieng kol bad poi sha ki kjat jong u Naorem Singh. Utei u wing u la ïoh ban khyrwit sha ka kol ba la ïoh ban kyrda da u Vishal Yadav, pynban ka bol ka la neh biang hapdeng madan ha kaba u Silva, uba la ïoh ban bat ïa ka bol khlem da pynlehnoh ei u la thep suk ïa ka bol shapoh ka jar.
Hadien hynñiew minit, ka Jamshedpur FC ka la ïoh ka kabu ban pynïakhaid hadien ba u Eli Sabia u la shut ïa ka freekick ba la ïoh ban bat ïa ka bol da u Ritwik Das hynrei ka bol ba u la khyrwit ka la lait noh sharud.
Ka jingïalehkai ka la nang ïakhaid ha kaba baroh arliang ki la ïakhun tyngeh ban ïathep kol, hynrie haduh kaba kut jong ka kylla step, ka East Bengal FC ka la lamkhmat da 1-0 kol.
Haba wanphai sha ka jingïalehkai jong ka kylla miet, ka Jamshedpur FC watla ka la ïakhun shabar na la ïing pynban ka la sei la ki bor bad k ibuit ban pynshat bad pyllait bol na ki rangïalehkai ka East Benggal kiba la ïakhun tyngeh ban khanglad ïa ki jingpyrshang thpe kol.
Dei ha ka minit ba 61 u rangïalehkai dien ka East Bengal u khlem ïoh ban bat ïa ka bol ha kaba u Pandita u la ïoh ban knieh ïa ka bol bad khyrwit sha ka kol hynrei u Lalchungnunga u la ïoh ban kyrda shwa ba u Sawyer un ïoh ban thep ïa ka kol pynïakhaid.
Lyngba katei ka jingthep ba mar shi kol ka jingïalehkai ka la nang ïathnem ha baroh arliang, hynrei dei ka Jamshedpur FC kaba la ïoh ban thep ïa ka kol pyntam kaba la wan lyngba u Ritwik Das uba la thep ha ka minit ba 85 bad haduh kaba kut ka Jamshedpur ka la lah ban teh lakam bad khur ïa ka nam jop.
Ka East Bengal FC ka dang neh ha ka kyrdan ba khyndai shadien ka Bengaluru FC kaba dang sah sa shisien ïalehkai. Ka East Bengal FC kan sa ïakhun khatduh pyrshah ïa ka Hyderabad FC ha ka 20 tarik Kyllalyngkot 2023.
Ka Jamshedpur FC ruh ka neh ha ka kyrdan kaba shiphew bad duna da lai poiñ ïa ka East Bengal FC kaba don ha ka kyrdan ba khyndai. Ka Jamshedpur FC kan sa ïakhun pyrshah ïa ka Bengaluru FC ha ka 18 tarik Kyllalyngkot.
