Shillong, Rymphang 04 : Ka Kiew Pyneh Rngiew kaba 25 sien kynthih ka Lum Sohpetbneng Committee ka Seng Khasi Kmie sha kliar u lum kyntang u Sohpetbneng, ka la long da shisha kaba da iphuh iphieng kaba da shongkun shong Blei da ka jingwan ban ïashim bynta ryntih da u paid ka Bri U Hynñiewtrep Hynñiew Skum u Hynñiaw Wasa.
Kumba ka juh long ha shwa ka kiew pyneh rngiew sha u Sohpetbeng, ka Lum Sohpetbeng Committee ryngkat ka Komiti u Tymmen U San ka Seng Khasi Kmie, ki juh pynlong shwa da ka nguh ka dem, ka shat ka kheiñ ka kñia ka khriam ha ki lai tylli ki jaka, katta ha Lum Dorbar ha Lawnongthroh, ha ka Mei Mawbuh bad pynkut pat sa ha ka duwan ka dupat jong u Lum Sohpetbneng.
Katkum ka kyrwoh, la ong ba ha kane ka kynti kaba mynta ki dak ki shin ki kdew ba U Blei Trai Kynrad ryngkat ki Ryngkew ki Basa ki da wan ban pynpaw ïa la ki jong ki dak ki shin ïa ka jingpdiang ka jong ki ïa kane ka jingkiew eh rngiew bad ïa kane ka lehniam la juh tip pat ïa ka kum ka Lehniam Shi Hat Shi Taïew.
Ki rangbah ba la lah ban lam khmat ha ka sien kiew eh rngiew kaba nyngkong eh ha u snem 1999 ki long kum ki jong Rgh Sumar Sing Sawian, (bam kwai ha dwar u Blei), kiwei pat ki riew rangbah kum ki jong u Rgh Dipshon L Nongbri bad baroh ki dkhot ba mynta ka Lum Sohpetbneng Committee, ka Seng Khasi Kmie, kiba im miet bad sngi ba da kumno ban nang pynjanai bad ban ïai pynwandur ïa kane ka lehniam leh rukom ba heh tam u khun Khasi baïar.
Ka kyrwoh ka ong ruh ba kumba ju long, hashwa ka jingsdang ban ïa kiew paidbah, u Riew Tymmen Riew San ka Seng Khasi Kmie, ki da pynlong biang ïa ka nguh ka dem ka dwai ka phirat na khyrdop kaba don mar pyrshah bad ka Pung Umïam, bad hadien kane pat la sdang ka jingïakiew paidbah sa sha kliar jong u Sohpetbeng, ba don pat ha u ïa ka khana tang jong ka jingïadei hapdeng u khun bynriew bad la u Blei Trai Kynrad, kaba mynnor lyngba ka jingkieng ksiar.
Ynda haba la poi ha kliar u lum bad halor ka duwan ka dupat, u riew tymmen riew san, u la shim ïa ka bynta ban pyndep ïa ka nguh ka dem lyngba u khaw bad ka um ban suit ban shor ban pynsum pynsleh ïa ka duwan ka dupat ka dak ban pynkyntang pat ïa ka
Ïa ka jingïalang la pynïaid da u vice Chairman ka Lum Sohpetbeng Committee u Rgh Païa B Synrem, la ïoh ïa ka kyntien pdiang sngewbha na u Chairman ka Lum Sohpetbneng Committee u Rgh I Sun bad ïa ka kyntien maitphang bad ka khana lyngkot kaba la ai da u Rgh D.L Nongbri vice president Seng Khasi Kmie bad u dkhot jong ka Lum Sohpetbneng Committee.
Hadien kane ka la dei pat sa ka pali jong ka jingïanguh ïa dem ïa duwai ïa phirat da u paid byllien bud pat sa ka jingsam ïa u khaw eh u khaw kheiñ ka um ksiar ka um rupa ban ïoh ruh ban rah rneng sha la ïing la sem sha u tnum u tyndai.
