Shillong, Risaw 27: U Samla Bobby Nongrum u nongshad ba donsap jong ka jaidbynriew uba na ka shnong Sohra Laitryngew na ka dong Lumsainar uba dei ruh u khun jong i Bah Loriwel Buhsan bad i Kong Betsiliana Nongrum.
U Samla Bobby u la ïoh rung ban leit sha ka Grand Finale ka India Talent Fight ïa ka video jong u lyngba ka online bad hadien kata u la shah jied sha ka Mega Audition bad mar mar u la leit ban ïakynduh ïa ki nongïalam jong ka All Meghalaya Dancers Association ban pan jingïarap kumno ban leit shapoh nongbah Delhi namar u dei tang u khynnah na ka thain nongkyndong. Kumta na ka liang ka AMDA khlem da pynslem ka la phone bad ka la ïoh ban ïa kren bad ki nongpynïaid jong ka India Talent Fight ban ailad ïa u samla Bobby Nongrum ban ïoh rung beit sha ka Semi Final khlem da donkam shuh ban leit biang sha ka Mega Audition khnang ban lait na ka jinglut jingsep bad na ka liang ki nongpynïaid ki la pdiang ïa u samla Bobby bad kiwei kiwei ban ïoh rung beit sha kane ka kyrdan.
Ki don haduh 8 ngut ki ba leit ïakhun ha ka jingïakop sawngut ki nongshad sawngut ki nongrwai bad napdeng kine baroh tang u samla Bobby Nongrum u la shah jied ban ïa khun ïa ka Grand Finale ka ban sa long shen ha baroh kawei ka ri India bad lada u jop ïa ka thong kan long ka burom bad ka jingwanrah nam ïa ka jylla Meghalaya. Ïa ka Grand Finale na ka liang ka India Talent Fight kan sa pyntip noh shen ïa ka Tarik bad u bnai lyngba u channel TV jong ka Ri India baroh kawei.
U samla Bobby un sa ïoh ban rung ha ki magazine jong ka Ri India shen shuwa ban pynlong ïa ka Grand final.
Ka company ka India Talent Fight ka la kular ba ka don ka kabu ksiar ban don ha ki video Bollywood Album bad ka Big Reality Show kaba la jer kyrteng Love War bad tang ki celebrity ki lah ban don hangne bad un long ruh u nongbishar ha ki episode ki ban sa wan.
Une u samla donsap u dei u khun ba wan na ka longing kaba duk ba shu im tang dakaba bylla tih maw ban pyndap pynbiang ïa ka ïing ka sem bad u la hap ban iehnoh tang shiteng ïa ka jingpule jong u na ka daw kiba bun ki jingeh ha ka ïing ka sem.
Na ka liang ka All Meghalaya Dancers Association ka phah ïa ka kitbok ehdaw ïa une u samla ba un poi sha ka thong ha kane ka jingïakop hynrei ha ka juh ka por ka pynpaw ïa ka jingsngew bynñiaw ïa ka jinglehklet ka sorkar ban kyrshan lang ïa ki samla kiba donsap ba kin kham pyntbit ïa ka sap kaba ki don.
