Ïoh u Bah Savio bad u Tridip ïa ka Redink Award halor ka phlim pyrshah Uranium ha Meghalaya

Shillong, Nohprah 17 : Ka jingpyrshah ïa ka jingthmu tih ïa u Uranium ha Meghalaya la ithuh bad tip ruh ha ka ri India lyngba ka short film ba ai kyrteng ‘How a village in Meghalaya fought against Uranium Mining’ ïa kaba la pynmih da ka khubor ‘Quint’ ha ka jingïatreilang bad u t7news na Shillong.
Kum ka dak ban ithuh ïa ki nongthoh kiba tbit bad ïa ki khubor, ka Mumbai Press Club la ai ruh ïa ka khusnam ba la tip da ka Redink Award, bad kane ka short film ka la jop ha ka kyrdan Environment Category (TV). Ha kane ka kyrdan ki don haduh 5 tylli ki phlim kiba la shah jied, bad ia ka jingjop la ïoh da kane ka phlim ba la pyni shaphang ki nongshong shnong ka Meghalaya bad khamtam eh halor ka jingieng rangbah I Mei-ieid Spelity Lyngdoh Langrin (Ba la khlad noh) ban pyrshah beit ïa ka jingtih ïa u Uranium na Domïasiat, South West Khasi Hills.
Ïa kane ka khusnam kaba heh sha ki nongthoh khubor la leit ban pdiang da u Bah Dominic Savio Diengdoh uba dei u Producer jong ka channel t7news bad u Tridip K Mandal uba dei u Producer jong ka khubor ‘Quint’ ha ka programme ba la pynlong ha Mumbai ha ka 16 tarik u Nohprah 2022 ha NCPA, Marine Drive.
Ïa kane ka phlim la pynmih da ka Quint bad la pynbit pynbiang da u Bah Savio bad ka kynhun jong ka channel t7 News. Kiba la ïoh ban khur bun tylli ki khusnam ha kane ka rynsan ka dei na ka BBC News.