Ïoh syrnod ki samla ba la pyndep Computer bad suh jaiñ na Auxilium Skills Training Centre
![](https://mawphor.com/wp-content/uploads/2024/01/training-Copy.jpg)
Nongpoh, K’lyngkot 24: Ka Auxilium Skills Training Centre, Khapmara, Bhoirymbong, mynta ka sngi kala ïoh ban sam noh ïaki syrnod sha ki 29 ngut ki khun samla kiba la pyndep ïaka jing shah hikai haka Domestic Data Entry Operator ka ba la bei tyngka daka Meghalaya State Skills Development Society (MSSDS) Shillong bad ïaki 10 ngut kiba lah pyndep ïaka Self-Employed Tailoring kaba la kyrshan hi daka Auxilium Skills Training Center.
Napdeng kitei ki khun samla la sam ruh ïaka syrnod Topper ha katei ka jingshah hikai bala ioh da ka samla Vitoria Sten bad u samla Bestarius Sten.
Kum ban shu kdew hangne, kane ka jaka ai jinghikai ïaki samla kaba la tip ruh kum ka Auxilium skills Training Center kaba Don ha Khapmara, Bhoirymbong ka la ai ïaka jinghikai bapher bapher sha ki khun samla mynta la 2 snem lynter bad dei mynta ka sngi bala ioh ban sam noh ïaki syrnod kum ka sngi sah jingkynmaw kaba dei ruh ka sngi ba sdang ïa katei ka jaka ai jinghikai.
Kane ka center ka ai ruh ïaki jinghikai kiba kynthup naduh ka jinghikai Computer, Fashion Designing, Self-Employed Tailoring, Art & Craft, Embroidery, Food Processing, Agriculture bad kiwei kiwei ki jait jinghikai kiba hap ban siew bad kiba ïoh ei bad haduh mynta kane ka jaka ai jinghikai ka la dep ban ai jinghikai haduh 500 ngut tam ki khun samla naki thaiñ bapher bapher.
Ha kane la sngi la wan ban sam ïaki syrnod sha ki khun samla da u bah Albinus Lyngdoh kum u kongsan haka jingdon lang u Bah R.S Nongbri Assistant Director MSME kum u symbud kongsan, Ka Kong Stefanie Nongbri (SDO), Sr. Manosha L.Nonglait, Sr. Jubil Mary Dkhar, Sr. Gemima Pohrmen Provincial Economer Shillong Province lem bad kiwei kiwei ki riew rangbah.