Shillong, Jymmang 15: Ka Shillong Government College of Engineering (SGCE), kaba dei kaba nyngkong eh ha ka jylla ka la ïoh ïa ka shithi jingpynskhem na ka All India Council for Technical Education (AICTE) ban sdang noh ïa ki under graduate course haba ïadei bad ka civil engineering bad electrical engineering na ka bynta ka snem pule 20250-26.
Haba pynbna ïa kane ha ka X, u Myntri Rangbah ka jylla u Conrad K Sangma u la ong, “Nga sngew sarong ban pynbna ba ïa ka Shillong Government College of Engineering ka la ïohpdiang ïa ka shithi jingpynskhem ne ka Letter of Approval na ka All India Council for Technical Education (AICTE) na ka bynta ban sdang noh ïa ka Civil Engineering bad Electrical Engineering course, naba kane ka dei ka engineering college kaba nyngkong jong ka jylla.”
Ka AICTE ha ka shithi jingpynskhem jong ka, ka la ong, “Ha kaba ïadei bad ki kyndon ba la buh hapoh ka All India Council for Technical Education (Grants of Approval for Technical Institutions) Regulations, 2020 kaba la pynbna ha ka 4 tarik jong u bnai Rymphang, 2020 bad kaba la pynkylla ha ka 24 tarik u Rymphang, 2021 bad kiwei pat ki jingpynbna, nga kwah ban ïathuh ba la dep ïoh ïa ka jingmynjur ha kaba ïadei bad ka Shillong Government College of Engineering na ka bynta ba kan pynlong ïa ki course na ka bynta ka snem pule 2025-2026.”
Ka la ong ba kine ki jingpule under graduate ki kynthup ïa ka civil engineering bad electrical engineering kaba lah ban pynrung ïa ki samla pule haduh 30 ngut.
Kumba 10 percent na ki seat yn shah bad kan shong ruh katkum ka bhah kaba dei lyngba ka EWS kaba dei ruh katkum ki rukom treikam ka sorkar.
Ka shithi ka la ong ruh ba kane ka jingpynskhem kan treikam kumba 2 snem naduh ka tarik ba la pynmih ïa kane ka shithi ha kaba ïadei bad ka university/board of technical education (BTE) board of technical education & training (BTET) kumba la aplai bad ban pyndap pura ïa ki jingdonkam jong ka sorkar jylla ha kaba ïadei bad ki kam pynrung klas.
La ong ba kane ka jaka pule ka donkam ban ïoh ïa ka jingbit ne ka jingithuh na ki university/BTE/BTET ba la ithuh kiba long ruh katkum ki kyndon ba la buh ha ka university/BTE/BTET.
