Shillong, Risaw 13 : Ki la don palat 80 ngut ki briew kiba la kem pang na ka jingsuba ba kadei na ka daw ka bam ha A.dokgre, North Garo Hills.
Katkum ka kaiphod ba la ïoh la ong ba ha ka 09tarik mynta u bnai ka la don ka jingïalehkai phutbol ha Chenangre Stadium, A.dokgre ha kaba ki paidbah na ka thaiñ kiba wan ban peit kai ki la kem pang hadien ba ki la dep bam ia u shana khleh na uwei u nongdie.
Ïa kitei ki paidbah ba kem pang la pynkit mardor sha A.dokgre PHC hynrei na ka daw ka jingshitom jur, kynthup ïa ki 6 ngut la pynkit noh mardor sha Guwahati bad Goalpara hospital na bynta ban ïoh ïa ka jingsumar kaba kham paka.
Ha kajuh ka por, ki tyllong khubor na ka tnad ka koit ka khiah ki ïathuh ba kitei ki briew kiba kem pang mynta ki la kham ïohbor ba kam don kano kano ka jingma.
Na ka liang ki bor distrik jong ka North Garo Hills la thung ïa ka kynhun tohkit halor kane ka jingjia.
Ym tang katta, ïa kine ki jingbam ba ki paidbah ki bam la phah sha Shillong na ka bynta ban phah test ba lap ïa ka daw tynrai.
