Shillong, Nailur 15 : Ki bor pynïaid jong ka Apollo Hospital ha Delhi ha ka Sngi U Blei ki la pynkynriah noh ïa u Symbud Myntri Rangbah ka Jylla, Bah Prestone Tynsong na ICU hadien ba u la kham ïoh bor na ka jingsumar.
Ïa kane la pyntip da u Commissioner & Secretary ka sorkar jylla, u Vijay Mantri ha ka kyrwoh khubor ha kane ka sngi U Blei.
“Katkum ka CT Scan la pyni ba la khlaiñ,” ong ka kyrwoh ba phah da utei u heh sorkar.
Tangba, u ong pat ba dang hap ban leh biang sa kawei pat ka scan ha shwa ban pyntikna ba u Symbud Myntri Rangbah u la biang nadong shadong ban ïoh leit phai ïing noh.
“La khmih lynti ba yn pyllait noh ha kane ka sngi Ba-ar,” bynrap biang ka kyrwoh.
Kumba shu kdew hangne, u Bah Prestone u la shah sumar ha Nazareth Hospital naduh ka 09tarik mynta u bnai bad hadien ba u la kham ïohbor la ïalam pat ïa u sha Nongbah Delhi ha ka step 11tarik ban ïoh ïa ka jingsumar kaba kham paka.
Dei ha ka sngi kaba bud, ba ka Apollo Hospital ka la sumar ïa u bad naduh katei ka sngi la pyntip ba u Symbud Myntri Rangbah u la nang ïohbor katba nang ïaid ki sngi.
