Mawkyrwat, ‘Naitung 06: Kum ka dak ban ai mynsiem ïa ki khynnah skul ki khun ki kti jong u (L) Maniwell Jahrin kumba ju leh manla u snem, ha ka sngi Saitjaiñ ki la pynkup burom ïa ki 17 ngut ki khynnah skul hapoh ka thaiñ Mawkyrwat kiba la leh bha ha ka eksam SSLC 2025 kaba la tip kum ka “Maniwell Jahrin Award for Academic Excellence 2025”.
Kum ban shu kdewm, ïa kane ka ‘Maniwell Jahrin Award for Academic Excellence’ la sdang nyngkong eh ha u snem 2004 kaba la ïaid mynta la 21 snem kynthih kaba long kum shibynta ban pynsah jingkynmaw bad pynsah nam ïa u (L) Bah Maniwell Jahrin (Bam kwai ha dwar U Blei) da ki khun ki kti bad ka jingsam ïa ki khusnam sha ki khynnah pule ka long ka dak ban pynshlur bad ai mynsiem shuh shuh ïa ki ba kin nang lehbha shuh ha ki jingpule.
U Chairperson jong ka Meghalaya Lakayukta u C.P. Marak u la long u kongsan bad ha ka jingkren u la ai mynsiem ïa ki khynnah skul ba kum ha kane ka juk ba mynta ki dei da lei lei ban shah ïalam bakla da ki kor ki bor jong ka juk stad ki mobile hynrei u la ai mynsiem ïa ki ba ki dei ban buh shadien ïa ka mobile phun bad buh sahkhmat ïa U Blei khnang ba phin poi ha ka thong jong ka jingjop la ha kano kano ka jingïaleh khamtam eh haba ki khynnah skul ki don hapdeng jong ki ïa leh eksam ki dei ban long kiba minot bad pule por ha ki jingpule ym ha ki kam bym ai jingmyntoi.
Kiwei de kiba la ïa donlang ki long ka Kong Pearly Marak, u bah Rosanund Syiemlieh, u bah Marshal Lyngdoh, u Tony Marak, u Babu Bording Lyngdoh, ki kmie ki kpa, ki nonghikai lem bad ki khynnah skul.
Ki khynnah kiba ïoh pdiang ïa ki khusnam “Maniwell Jahrin Award for Academic Excellence 2025” ki long ka Satilang Wahlang na ka Hynñiew Shnong Higher Secondary School, Shngimawleiñ kaba ïoh 89.66%, u Nelson Cooper Marbaniang na ka Little Star Higher Secondary School uba ïoh 89.16%, ka Medaaihun Marweiñ na ka Nativity Higher Secondary School, Mawkyrwat kaba ïoh 89% bad kiwei kiwei.
