ïoh M-TAB ki khynnah skul ka EJH, kyntu bym dei ban pyndonkam bakla

Khliehriat, Jymmang, 15: Ka ophis u Deputy Commissioner, East Jaiñtia Hills District ryngkat ka jingïatreilang bad ka ophis District School Education Officer, East Jaiñtia Hills District ha ka sngi Palei ka la sam sha ki khynnah skul ïa ki M-TAB lyngba ka Chief Minister’s Students Digital Learning Scheme.
U Myntri ka Sorkar Jylla Bah Kyrmen Shylla bad ka MLA jong ka Sutnga-Saipung Constituency Kong Santa Mary Shylla ki la long ki kongsan ba la phiah ha ki ar bynta.
Ïa ki Tablet la sam sha ki khynnah kiba pule ha ka kyrdan Higher Secondary na ki khat-lai tylli ki skul kiba don ha East Jaiñtia Hills District. .
Ki ngut ki MLA na East Jaiñtia Hills District ki la kyntu ïa ki khynnah ba kim dei ban pyndonkam bakla ïa ki Mobile Tablet hynrei ki dei ban pyndonkam ïa ki ha kaba lum jingtip ban kyntiew shuh shuh ïa ka jingnang jingstad. Ki la pynpaw ruh ka jingsngew nguh ïa ka Sorkar Jylla kaba la shim ïa ki sienjam ban kyntiew ïa ka bha ka miat jong ki paidbah nongshong shnong jong ka jylla ha ka pule puthi, ka koit ka khiah bad ha kiwei kiwei ki bynta.
U Bah Kyrmen Shylla u la kren shaphang ka jingtrei shitom ki kmie ki kpa ban pynïoh ïa ka jingnang jingstad ha ki khun, ban saiñdur ïa ka lawei jong ki khun ki kti bad u la kyntu ïa ki khynnah skul ba kim dei ban pynlehnohei ïa ka lad ka kabu ba ki ïoh namar ka jingnang jingstad ka long kaba donkam haduh katta katta.
Ka Kong Santa Mary Shylla ka la kren halor ka jingdonkam ka Digital Learning bad ka la ïathuh ïa kane kaba long katkum ka jinglap jong ka ha ka jingleit shim bynta ïa ka Artificial Intelligence (AI) Conference kaba long ha Belgium ka la kren halor ka jingkiew ki kor ki bor jong ka technology ha ka pule puthi.
Ka la kyntu ïa ki khynnah skul ba kim dei ban pynbyrngia than ïa lade ha kiei kiei ki bym dei hynrei ban pyndonkam ïa ki Digital Learning ha kata ka rukom ban kyntiew ïa ki ha ka jingnang jingstad ka ban tei ïa ki.
Ka la ong ruh ba kane ka Digital Learning kan ïarap ruh ban pynsuk ïa ki khynnah pule ha kaba wad jingtip ha kaba ïadei bad ka pule puthi jong ki.
Katba u Deputy Commissioner jong ka East Jaintia Hills District u Shivansh Awasthi u la ong ba ka jingsam ïa ki Mobile Tablet sha ki khynnah ka dei ka jingïohi jngai jong ka sorkar kaba ladep jia kum ha ka por ba dang don ka khlam COVID kaba la pynpaw ïa ka jingdonkam ka Digital Learning ha ka pule puthi.
U la ong ruh ba kine ki Mobile Tablet kim dei tang ha kaba lum jingtip ha ka pule puthi hynrei lah ban pyndonkam ruh ha kaba wad jingtip ïa kiwei kiwei ki jait kam kum ka Skill Learning kiba lah ban ïarap shuh shuh ïa kito ki khynnah kiba don ka sap ka phong. U la kyntu ïa ki khynnah ba ki dei ban pyndonkam bha ha ka ruom ban kyntiew ïa ki ym ban pyndonkam bakla.
U la kren ruh halor ka jingshimkhia jong ki bor synshar district ban kyntiew ïa ka pule puthi ha East Jaiñtia Hills District lyngba ka District Mineral Funding (DMF) ha kaba la lah ban buh ïa ki Smart Classroom, la lah ban pynlong ïa ki prokram ai jinghikai ne ki soft skills training programme na ka bynta ki skul bad ki khynnah skul hapoh ka district.
Ha kane ka sngi la sakhi lang da ka Additional Deputy Commissioner ka Kong J.U Kharpuri, ka District School Education Officer East Jaiñtia Hills District Kong A. Syiem, u ADC Bah G.Warjri bad kiwei kiwei.