Ïoh kurup ki Pulit ka Ri Bhoi ïa u drok ba shongdor 4.8 klur na Ri Bhoi, shah kem u nongshalan tuh

Nongpoh, Risaw 31: Da ka jingbuddien bad ka jingpynap shrip ki pulit hadien ba la ioh jingtip ba la don u nongshan beain ïa u drok ba la tip kum u ‘Heroin) ba thmu ban shalan na Manipur sha Shillong, ki Pulit ki la ioh noh ban bat ïa ka Kali bad ioh kurup ïa u drok ba shong dor kumba T. 4.8 klur.
Kane ka jingioh kurup ki Pulit ka Ri Bhoi ïa utei u Drok ka dei hadien ba ki la pynap shrip ïa katei ka Kali kaba wan na Manipur bad thmu ban leit pynhap ïa utei u Drok sha Shillong, hynrei hadien ba la poi ha Byrnihat ki pulit ki la ioh bat noh ïa katei ka Kali ba ki la ioh ruh ban kurup ïa u Drok bad kem ïa utei u nongshalan beaiñ ïa u drok.
Katei ka Kali ba la ioh bat da ki Pulit ka Ri Bhoi ka don ïa u Number ML 05-S- 9485 bad utei u ba la shah kem la tip kyrteng kum u Simtekhan Tluanga na Manipur.
Kumba la pyntip da u Superintendent of Ri Bhoi Police, u Giri Prasad, u la ïathuh ba kane ka jingioh kurup ïa u drok ka dei hadien ba ki la ioh jingtip ba don ka kali kaba thmu ban pynpoi ïa u drok na Manipur sha Shillong bad ha ka jingpynap shrip ha Byrnihat la ioh bat noh ïa ka kali bad kumjuh ruh la kem ïa u nongshalan bad kurup ruh ïa utei u drok ba thmu ban pynpoi tuh sha Shillong.
U la ïa thuh ruh dei ha ka por 5.30 pm jong ka janmiet sngi U Blei, ba ki Pulit da ka jingpynap shrip ki la ioh ban bat bad ban kurup ïa u Drok bad sa pynlong ïa ka jingtohkit katkum ki kyndon jong ka aiñ.
Shuh shuh, u la ïathuh ruh halor kane ka jingioh kurup drok bad kem ïa utei u nongshalan beaiñ la dep ban register case pyrshah katkum ka NDPS Act bad ka jingtohkit halor kane ka jingioh kurup ïa u drok ka dang ïaid shakhmat, u la bynrap.