Ïoh kurup ki Pulit ïa ki tiar siat bad kuli siat helicopter ka GNLA na khlaw Pilgonggre

Shillong, Nailar, 13 : Ki Pulit ka rilum Garo ha ka step sngi saitjaiñ ki la ïoh kurup shi bun bah ki tiar siat bad ki kuli jong ka seng kieng atiar Garo National Liberation Army (GNLA) na ka khlaw Pilgonggre kaba hap hapoh ka Williamnagar Police Station.
Watla u Sohan D Shira, uba dei u Self Styled Commander-in-Chief jong ka Garo National Liberation Army (GNLA) u la shah siat ïap ha ki Pulit ka Jylla Meghalaya ha ka jingïasiat kaba la jia ha u snem 2018 hynrei ki Pulit ki dang ïai bteng ban ïoh kurup ïa ki tiar siat, ki kuli bad ki tiar pynbthei jong kane ka seng kieng atiar na ki khlaw ba rben jong ka rilum Garo.
Ïa kine ki tiar siat, la suba la buhrieh da u Sohan D. Shira mynba u dang im bad mynba ka GNLA ka dang khie rasong bha ha rilum Garo.
Ka kynhun jong ki Pulit tang shu ïoh jingtip halor kane, ki la hiar sha Pillonggre jong ka Durama Range ha ka por shiteng synñia ban leit wad ïa kine ki tiar siat jong ka GNLA.
Dei ha ka por kumba 1:45 baje eiei mynstep ki Pulit ki la ïoh kurup ïa kine ki tiar siat na Pillonggre. Kine ki tiar siat bad ki tiar pynbthei ki kynthup ïa 79 tylli ki kuli siat helicopter bym pat pynbthei, 175 tylli ki kuli 7.7 bym pat pynbthei, 10 tyllli ki tikli, kawei ka suloi ar ktang bad kumba 250 gram u Gelatin.
Ki Pulit ki la rejistar case halor kane khnang ban pynlong shuh shuh ïa ka jingtohkit halor ka jingïoh kurup ïa kine ki tiar siat.