Nongpoh, Ïaiong 05 : Ha ka jingbteng ki Pulit ka Ri Bhoi lyngba ka kynhun Ri Bhoi Anti Narcotic Task Force (ANTF) ban ïakhun pyrshah na ka jingkharoi u drok mynta ka sngi ki la ioh biang ban kurup ïa u drok bad la ioh ruh ban kem ïa uwei uba la kynnoh don kti ha kane ka kam khaïi beaiñ ïa Drok.
Kane ka jingioh kurup drok ki pulit ka dei hadien ba ki la ioh jingtip kaba thikna bad tang ha ka por 1 baje ei ei ki la ioh ban bat ïa kawei ka Kali Sumo kaba don ïa u Number ML10 A 2089 ha Shangbangla bad la ioh ban kurup ïa u Drok Heroin na katei ka Sumo bad la ioh ruh ban kem ïa uwei uba don kti ha kane ka kam beaiñ.
Ha ka jingtalasi ki bor pulit la lap ïa u drok ba la thep ha ki kynja synduk sabon ba la kot 20 synduk bad la kem ruh ïa u Dipankar Ghosh, 35 snem ka rta uba dei na Upper Jail Road East, Shillong, East Khasi Hills ba la kynnoh ba don kti ha kane ka kam ban khaïi tuh ïa une u drok.
Ka jingkhia jong une u drok ka la poi sha ka 191.02 gms bad lyngba ka jingwad bniah lyngba ki kor ki bor la pynthikna ruh ba une u drok u dei u Drok heroin.
Ïa utei u nongkhaïi la kem noh da ki Pulit bad la wan rah noh sha Nongpoh Police Station ha kaba la pyngngat ruh ïa u katkum ka kyndon aiñ jong ka Narcotic Drugs and Psychotropic Substances (NDPS) Act.
