Ïoh knieh ki 8 ngut ki samla ba ïakhun private ha ka thup Top20 ha ka result SSLC 2025

Shillong, Ïaiong 06 : Ha ka result jong ka Secondary School Leaving Certificate (SSLC) ba pynbna da ka Meghalaya Board of School Education ha ka sngi Saitjain ki la don haduh 85 ngut ki samla pule na ki skul bapher bapher kiba wan ha ka thup T20.
Hynrei napdeng kine ki 85 ngut ki samla kiba pass bha, ki la don pat haduh 8 ngut ki samla kiba la paw kyrteng kum ki samla ba ïakhun private lane lah ban ong ba ki dei na ki skul shimet.
Baroh ki la don haduh 1430 ngut ki samla ba ïakhun private ha kane ka eksam hynrei napdeng kine, haduh 971 ngut ki pass kaba kdew ba ka jingdon kiba pass ka la kot sha ka 67.90 persen.
Katkum ka thup kyrteng jong ki samla ha ka thup Top20, kine ki hynriew ngut ki kynthup ïa ka samla Sagarika Ray kaba la wan ha ka krydan kaba 13 bad ïoh distinction ruh ha kiba bun ki sobjek (E,M,S&T,SSc,HPE,As) ha ki 562 mark ba ka ïoh.
Hadien jong ka bud pat sa ka samla Shreya Kumari ha ka kyrdan kaba 14 kaba la ïoh haduh 561 mark bad ïoh distinction ruh ha baroh ki sobjek (E,M,S&T,SSc,HPE,As).
Ka samla Ibadahun Kharshanhun kadei kawei na ki 8ngut kaba la ïoh jaka lang ha katei ka thup Top20 da kaba ïoh ban wna ha ka kyrdan kaba 15 bad ïoh haduh 560 mark nalor ki distinction ha baroh ki sobjek. (E,M,S&T,SSc,HPE,Kh).
Nalor kine, ka samla Gracy Lyngdoh kaba la ïoh haduh 559 mark bad disctinction ha baroh ki sobjek (E,M,S&T,SSc,HPE,Kh) ka la wan ha ka kyrdan kaba 16.
Ka samla kaba san na ka thup ki samla ba ïakhun private ha kane ka eksam Matrik dei ka samla Fenisha Pathaw kaba la ïoh haduh 556 mark bad ïoh distinction ha baroh ki sobjek (E,M,S&T,SSc,HPE,Kh), ban wan ha ka kyrdan kaba 19.
Ki la don ruh haduh lai ngut ki samla ba ïakhun private kiba la ïoh ban rung lang ha ka thup kata ha ka kyrdan kaba 20 ha kane ka eksam Matrik. Kine ki kynthup ïa u Aditya Yadav (E,M,S&T,SSc,HPE,Ae), Zelvi Kurbah (E,M,S&T,SSc,HPE,Kh) bad Haphidawadbha Phawa (E,M,S&T,SSc,HPE,Kh). Kine baroh ki la ïoh ban khur mar 555 mark bad ïoh distinctioin ha baroh ki sobjek.
Lah ban kdew hangne ba kane kadei ruh ka sien kaba nyngkong ba ki don haduh 85 ngut ki samla ban ïoh jaka ha ka thup Top20 bad ruh ba kiba pass kin kynjoh sha ka 87.10 persen kaba la kiew kumba 31.3 persen na ka result jongu snem ba la dep.
Lada shu phaidien dang tang ha ka result SSLC ha u snem 2024 ki la don tang 55.80 persen ki samla kiba pass kaba mut mala mala jan kot mar shiteng kiba phiel ha katei ka eksam ha u snem ba la dep.