Mawkyrwat, K’lyngkot 03: U samla Kisen Wanniang uba ha ka rta kaba 14 snem na ka shnong Mawlangwir, South West Khasi Hills District bad uba pule ha Presbyterian Higher Secondary School, Mawlangwir u la ïoh pdiang ïa ka khusnam Pradhan Mantri Rashtriya Bal Puraskar (PMRBP) namar ki kam shlur bad ka jinglen lade. ïa kane ka khusnam u la ïoh pdiang na ka President jong ka Ri India ka Droupadi Murmu ha jingïalang ba la long ha Rashtrapati Bhavan, New Delhi ha ka 26 tarik u Nohprah, 2024, ha Rashtrapati Bhavan, New Delhi.
Ka ka jingleit shim jong u samla Kisen Wanniang ka la long ka jingsarong ïa ka ïing ka sem, ka district bad ka Jylla Meghalaya namarba u dei uwei napdeng ki 17 ngut kiba la ïoh pdiang ïa ka khusnam Pradhan Mantri Rashtriya Bal Puraskar namar ki kam shlur bad ka jinglen lade.
U Kisen Wanniang u dei uba la pyllait im ïa ki saw ngut ki heprit na ka jingngam jyllop ha ka Wah Maweitksar, kaba don ha Mawlangwir, South West Khasi Hills District ha kaba ki saw ngut ki hep rit ki long u Heprit Gidian Thongni 9 snem, ka heprit Naphisadona Thongni 11 snem, ka heprit Haphibansuk Thongni 10 snem bad ka heprit Carefully Thongni 12 snem.
Kane ka Pradhan Mantri Rashtriya Bal Puraskar ka dei ka khusnam ba heh duh ba ju ai sha ki nongshong shnong ka Ri India ha kaban pynkup burom ïa ki Khynnah kum ka jingithuh ïa ki kam shlur bad ka jingshakri ha ka imlang sahlang. Ki nongïoh khusnam ha kane ka kynti la jied na ki 14 tylli ki Jylla bad ki Union Territories.
Namar ki kam shlur jong u samla Kisen Wanniang, ka Dorbar Shnong jong ka shnong Mawlangwir, ka Seng Samla Shnong Mawlangwir, ka Seng Kynthei Shnong Mawlangwir, bad ka VDP jong ka Shnong Mawlangwir bad ha ryngkat ka HYC Mawlangwir Unit ki la ïoh ban pynkup burom ïa une u samla ha ka jingïalang ba la long ha Phyllaw jong ka Balang Mawlangwir Higher Secondary School, Mawlangwir.
Ha kane ka jingpdiang burom ïa u samla Kisen, u Myntri Shnong, u Bah N.S. Wanniang, ula ai ki kyntien kyrkhu kyrdoh bad pynshlur ïa utei u samla ba un nangleh ki kam shlur bad ban long ka nongmuna ïa kiwei. Shuh shuh, u la kyntu ïa u samla Kisen ba un ïai long u samla uba sngewrit wat haba u la ïoh pdiang kat ïa katei ka burom.
U samla Kisen Wanniang u la ai ka jingkhublei ïa baroh kiba la ïa ai mynsiem ïa u bad don ryngkat bad u ha ka jingleit jong u sha New Delhi.
Ki bahaïing hasem ki la pynpaw ka jingai khublei ïa ka Dorbar Shnong Mawlangwir, ka ophis jong u District Social Welfare Office, South West Khasi Hills District bad u Deputy Commissioner jong ka South West Khasi Hills District kiba ka shimkhia kyrpang na ka bynta ban pynpoi ïa u samla Kisen shaduh sha Delhi ban pdiang ïa ka khusnam Pradhan Mantri Rashtriya Bal Puraskar.
