Ïoh khusnam ka Mawlynnong kum ka jaka jngohkai pyrthei ba itynnat tam ha ri India

Shillong, Nailar, 26: Ka shnong Mawlynnong kaba la bna nam kum ka shnong kaba khuid tam ha dewbah Asia, ka la ïoh sa kawei pat ka nam bad mynta ka kynti kane ka shong ka la ïoh khur ïa ka takma rupa kum ka jaka jngohkai kaba itynnat tam ha ri India lane ka ‘Best Eco Tourism Destination.’
Ïa kane ka khusnam la pynkup sha ki nongmihkmat ka Sorkar Meghalaya ha ka jingsam ïa ka Outlook Traveller Awards 2022 ba la pynlong ha New Delhi dang shen.
Ka jingai ïa kane ka khusnam Outlook Traveller Awards ka long hadien ba la bishar bniah ïa kane ka shnong kum kawei na ki jaka ba ki nong shang suwari ki ju tuid bha bad naba kane ka shnong ka la paw bha ha ka karkhana jngohkai pyrthei.
Ïa ki nongïoh khusnam la jied da ka kynhun ki riewshemphang na kylleng ka ri bad na ki Agency jong ka Sorkar da kaba pynshong nongrim katkum ka jingpawnam ha ki kam jngohkai pyrthei. Ïa ka khusnam la aiti da u Union Minister jong ka tnat Tourism & Culture bad ka Development of North-Eastern Region of India u G. Kishan Reddy.
Nalor ka shnong Mawlynnong, kiwei pat ki jaka ba pawnam ha Meghalaya kiba la rung ha kane ka thup ka dei ruh ka surok kaba pynïasoh na Shillong sha Sohra kaba la shah jied kum ka surok kaba itynnat tam ha ka India
Haba pynpaw ka jingsngewkmen halor kane ka jingïoh khusnam u Myntri Rangbah ka Jylla u Conrad K. Sangma u la ong, ba ka kam jngohkai pyrthei ka la nang kiew shaphrang bad ka la wanrah ïa ka roi ka par sha ki shnong nongkyndong.
“Ka sorkar jong ngi ka la trei shitom ha kine ki saw snem ba la leit noh ban rah shajrong ïa ka jylla Meghalaya kum ka jylla kaba pawnam ha ka jingdon jong ki jaka jngohkai pyrthei ba itynnat. Kane ka khusnam ba la ai da ka Outlook Traveller kan long kum ka sabut kaba pynshisha halor kane ka jingtrei shitom. Nga thikna, ba ka Jylla Meghalaya kan sa nang kiew shaphrang bad kan nang ïai paw kum ka jaka jngohkai pyrthei kaba iynnat tam ym tang ha India hynrei wat ha ka pyrthei baroh kawei,” ong u Sangma.
Ban shna pynbha ïa ki jaka jngohkai pyrthei ka dei ka thong jong kane ka sorkar kaba mynta. Ka Sorkar MDA ba la ïalam da u Conrad Sangma ka la mang pisa T. 16,00 klur ban kyntiew shuh shuh ïa ki kam jngohkai pyrthei khnang ban kyntiew ïa ka ïoh ka kot ha ka jylla.
Ha u snem 2015, ka shnong Mawlynnong kaba hap hapoh ka East Khasi Hills District, ka la ïoh ïa ka jingithuh na ka Sorkar Pdeng kum ka Role Model Village lane kum ka shnong kaba pyni nuksa ïa ka jingleh khuid ha ka ri baroh kawei.