ïoh kem ki Pulit ïa ki nongpynïap briew, suba donkti ban pynïap ïa baroh 2 ngut ki nongniah tourist

Shillong/ Jowai Nailar 24 : Hadien ka jingbud dien kaba jur da ki pulit jongka West Jaintia Hills ban ïoh kem ïa ki briew kiba ju donkti ban rahbor bad pyniap ïa ki nongniah Tourist Taxi, mynta ka sngi ki la ïoh ban kem ïa ki saw ngut kine ki nongpyniap briew tangba ki pulit kim pat kwah ban pynpaw kyrteng namar ka jingtohkit ka dang ïaid shakhmat ban ïoh kem ïa kiwei kiba ïadon kti lang.
Ki pulit ki suba jur ba ka dei kane ka kynhun kaba donkti ban rahbor ïa u Damehipaia Papeng 24 snem ka rta uba dei u nongñiah Tourist Alto uba la jah naduh ka 10 tarik bad ïa ka met iap jongu dang lap mynta ka sngi bad ïa u Fulmoon Kharsahnoh uba dei u nongñiah toursit taxi ( Swift) uba jah naduh ka 16 tarik bad lap ïa ka metiap jongu tad haduh ka por janmiet ka sngi ba bud.
Lah ban pynkynmaw ba u Damehipaia Papeng u dei u nongniah toursit uba na ka shnong Khonshnong bad u shong u sah ha Mihmyntdu. U la jah rngai naduh ka 10 tarik mynta u bnai ha ryngkat ka kali ba u ñiah. Ki pulit ki la ïai thwet bad bud dien ïa kiba donkti bad ki la ïoh ban kem ïa kine kiba suba jur mynta ka sngi. Nyngkong ki pulit ki la i suba jur ïa uwei u briew bad kumta ki la kem ïa u bad haba ki la tohkit bniah u la phla ba u dei uwei na kiba donkti ban rahbor bad pyniap ïa u Damehipaia.
Hadien ba ula phla ki pulit ki la phah ïalam ia u sha ka jaka ba ki la pyniap bad bret ïa ka metiap u Damehipaia bad ha ka jingïalam jongu ki pulit ki la lap ïa ka metiap najan ka Cattle Market, Mukoi Mihmyntdu hapoh kawei ka lawbniah kaba jngai kumba 1 Km na surok Jowai Bye Pass (Soomer-Thadlaskein Road) .
Une u dei na Khonshnong bad ula poi shongkha sha Mihmyntdu bad u ñiah ïa ka Alto -800 tourist taxi ML 04 D 2009. Da ka jingphla jongune uba la ïoh kem nyngkong da ki pulit, ki pulit ki la ïoh ban kem sa ïa kiwei kiba ïadon kti lang. Kine ki briew ki la phla hadien ba ki la dep rahbor bad pyniap ïa u Damehipaia ki la rahbor ïa ka kali sha ka shnong Kalain bad die ïa ka ha kane ka shnong kaba hap hapoh District Cachar.
Uwei pat uba la shah rahbor bad shah pyniiap u dei u Fullmoon Kharsohnoh 25 snem ka rta bad une u dei na ka shnong Larnai, West Jaintia Hills bad u dei uba kamai tourist taxi na Jowai sha Shillong. Ula jahrngai ha ka 16 tarik bad lap ïa ka met jongu ha ka sngi ba bud napoh kawei ka khlaw na Mynkre, East Jaintia Hills. Ki runar ki la pyniap da kaba teh ïa u na kti bad kjat bad kumjuh ruh na ryndang bad ki la pyndonkam da ki kynja triar ba nep ban pyniap ïa u.
Na ka liang ka Dorbar Shnong Khonshnong West Jaiñtia Hills, lyngba ka khubor ba la phah da u ma Sumarhok Passah, Waheh Shnong Khonshnong, kala pynrem jur ruh ïa kito ki riew runar ki riew thrangsnam kiba la kloi ban shim ïaka jingim briew tang ban ïoh Pisa ban ïoh im pahuh.
La pynrem jur bad dawa ruh “Kum kito ki jaitbriew kim dei ban ïoh ban im laitluid ha sla pyrthei, ka aiñ ka dei ban pynngat kyndon bad set shirta jingim ïa kum kine ki jait jingjia, khnang ba kitei ki juh ki jingjia kin nym ïohlad shuh ban jia biang hadien habud”.
Ha ka juh ka por ka Dorbar Shnong ka pynpaw ïaka jingsngewnguh ïa baroh kito ki paralok parajor kiba ïa don bynta lang ha kaba ïawad ïa u Dameihipaia Papeng naduh ka sngi ba u la jah haduh ka sngi ba la lap ïa u mynta ka 24 tarik na Mihmyntdu Mynkoi sha rum ka surok Cattle Market ha i wei i khlaw ba rit ba don hajan ka surok khyndew kaba jngai kumba 1 KM duna na ka surok Jowai Bye-pass (Soomer-Thadlaskeiñ Road).
Lah ban pynkynmaw ba u Dameihipaia Papeng uba don 24 snem ka rat ula jah naduh ka 10 tarik mynta u bnai haka por ba u dang kamai kali Tourist Alto ML-04D-2009 na Jowai-Lad Rymbai-Khliehriat, naduh katei ka sngi kila pyrshang wad ïa u kylleng ki jaka hynrei dang mynta ka sngi la lap ïaka metïap jong u na Jowai Bye-pass Mihmyntdu.
Ki runar ki la pynïap bad bret ïaka metiap jong u, katba ïaka kali jong u Dameihipaia Papeng pat ki la rah sha ka liang Silshar Assam.
Ka kyrwoh na u Waheh Shnong Khonshnong uyla pynpaw ïaka jingsngewsguh ïa ka Synjuk ki Waheh Chnong Ri Jaiñtia, Synjuk Waheh Chnong East Jaiñtia, Synjuk Waheh Shnong Saphai-Iooksi Circle, Balang Presbyterian Mihmyntdu, Kur Rymbai Mihmyntdu, ki nongshong shnong ka shnong Khonshnong, ki paralok parajor bym lah ñiew kyrteng shuh bad khamtam ïaki Pulit ka East Jaiñtia bad West Jaiñtia Hills kiba la trei shitom khlem shongthait haduh ba la lap ïaki riew runar.