ïoh kem ki Custom 3 ngut ki nongkhaïi ksiar tuh na Shillong, kurup ksiar ba shongdor 1 klur

Shillong, Nailur 24 : Ka Tnad Custom ka la ïoh ban kem ïa 3 ngut ki nongkhaïi ksiar tuh ha ka step Sngi Saitjain na Nongbah Shillong bad ïoh kurup ïa ki biskit ksiar bar Ri kiba shongdor haduh 1 klur tyngka.
Halor ki jingtip ba thikna ba ka don ka jingkhaïi tuh ïa ki biskit ksiar bar ri lyngba ka khappud India-Bangladesh na Meghalaya lyngba kawei ka kali na Guwahati, ki Ophisar ka Ophis u Commissioner of Custom Preventive (CCP), Shillong, ki la ïoh bat ïa kawei ka Mahindra XUV 500 ha ka step 23 tarik Nailur na Jhalupara, Shillong.
Ha kane ka kali u don uwei u briew uba shong ha Rangia, Assam watla u dei uba na West Bengal.
Ha ka jingtohkit, une u briew ula phla ba kane ka ksiar bar ri la pynpoi na Bangladesh ka dang don bad u bad kumta hi, ki Ophisar ka Custom ki la khynra ban ïoh kurup haduh 14 tylli ki biskit ksiar ba la song ha ki artylli ki bek plastic.
Kine ki biskit ksiar ki khia haduh 1632.450 gram bad ki shongdor haduh 1,01,78,326 tyngka, ong ka kyrwoh na ka CCP.
La pyntip ba hadien kane, ki la ïoh jingtip pat sa ïa uwei u briew uba ïadonkti lang bad uba aiti ïa 7 tylli ki biskit ksiar bad ha ka jingbuddien wut wut, ki Ophisar ka CCP ki la ïoh bat ïa une u briew na Jhalupara.
Une u briew ula phla ba ula leit shim ïa kine ki ksiar na kawei ka Kynthei ha ka dukan kaba don ha ïewduh, Shillong.
Ha ka jingtohkit bniah ïa kane ka dukan, la ïoh pat ban kurup ïa ka pisa ba 9.5 lak tyngka kaba dei ka pisa ba thied ïa kine ki biskit ksiar. ïa kane ka pisa ruh la kurup noh da ka Custom.
Ha ka jingtohkit ïa kane ka Kynthei, la shem ba ïa kane ka ksiar la wan pynpoi tuh na khappud ka Indo-Bangladesh.
Lai ngut ki briew ki la shah kem bad ka jingtohkit mynta ka dang ïaid shakhmat, ong ka CPP.
Lah ban kdew ba ha kawei pat ka case jong u bnai ba la lah, ki Ophisar ka CCP, Shillong ki la ioh kurup ïa 5 tylli ki biskit ksiar ba khia 582.70 gram, na uwei u briew hajan Jorabat. ïa une u briew la ïoh bat na kawei ka Maruti Car.
ïa kane ka ksiar la wan pynpoi na Bholaganj kaba don ha khappud Indo-Bangla. Ha ka jingbuddien mar mar la hiar khynra ïa ka ïing ha Lumpariang, kaba dei ka jaka ba leit shim ïa kane ka ksiar, la ïoh kurup ïa ka pisa India ba T. 3.96 klur ïa kaba la ngeit ba ka dei ka pisa ba die ïa ka ksiar.
Ka jingtohkit ïa kane ka jingjia ruh ka dang ïaid shakhmat.
Ha kajuh ka por, ka CCP ka ong ba ka Tnad Custom ka dang kut jingmut ban ïakhun pyrshah ïa baroh ki kam bymman ba ryngkang khappud kynthup ka jingkhaïi droks, cigarette, droks, ki mar jong ki mrad khlaw, ka pisa thok, ki kam thok ha ka khaïi ka pateng bad kiwei kiwei.
Ka ong ba mano mano ruh ki lah ban kyrshan ïa kane ka jingïakhun pyrshah ïa ki kam bymman ba ryngkang khappud haba kular ba ïa ki kyrteng jong ki nongai jingtip ym tang ba yn buhrieh bha, hynrei kan don ruh ka skhim ai khusnam kaba dei ka jinglait siew ïa ka Income Tax.