Shillong, Nailur, 24: Ka tnat Transport ka la duh ïa ka jingïoh lum khajna kaba kot haduh T. 23.75 klur.
Kane ka long na ka daw ka jingbym lah jong u Commissioner ka tnat Transport ban pyntreikam ïa ki kyndon jong ka jingïasoi kontrak na ka bynta ban buh ïa ki Integrated Check Gate-cum-Weighbridge bad ka jingbym peitngor ha kaba ïadei bad ka jingtreikam jong ki Weighbridge.
“…ka tnat Transport ka la phiel na ka daw ka jingbym lah ban jied ïa ki laisen na ka bynta ki Weighbridge, ban pynthikna ba baroh ki Weighbridge bad ka la phiel ruh ban lum ïa ka pisa kaba shisien shi snem ha ka por kaba biang,” ong u Comptroller and Auditor General of India (CAG) ha ka kaiphod halor ka jingïohlum khajna haduh kaba kut jong ka 31 tarik, Lber, 2022.
“Kane ka la wanrah ïa ka jingbym ïohlum khajna kaba kot haduh T. 23.75 klur bad ka la pynduh noh ïa ka jingthmu ha kaba ïadei bad ka jingbuh ïa ki Weighbridge na ka bynta ban tehlakam bad ban khanglad ïa ka jingkit palat pud jong ki trok kit mar,” la ong ka Kaiphod.
Ka kaiphod ka la ong, hynñiew na ki phra tylli ki Weighbridge ba la pyntreikam la lap ba ki dang pynsahteng ban siew ïa ka pisa kaba ki hap ban siew shisien shi snem. Na kine ki hynñiew tylli ki Weighbridge, ka jingtohkit ka la lap ha kaba ïadei bad ka Weighbridge ha Majai, East Khasi Hills, u nongwai khyrdop um shym la aplai ïa ka laisen na ka bynta ban pynthymmai/pynjlan ïa ka laisen jong u tad haduh ka tarik ba la pynlong ka jingtohkit (Kyllalyngkot, 2022) watla ka por jong ka laisen ka la kut naduh ka 27 tarik, Risaw, 2021.
U nongwai khyrdop um shym la siew shuh ïa ka pisa kaba dei ban siew shisien shi snem naduh u Nailur, 2019 bad nalor ba ki dang don sa hynñiew tylli ki jingsiew ba dang sah kiba dang dei ban siew.
Lai tylli kiwei pat ki Weighbridge kim shym pat siew satia wat tang shisien ruh ïa ka pisa kaba ki dei ban siew shisien shisnem naduh ka tarik ba ladep ïasoi ïa ka sorkular.
Kiwei pat ki lai tylli ki Weighbridge ruh kim shym la siew wat tang shisien ruh. Hynrei, ka tnat kam shym la leh eiei pyrshah ïa ki nongwai khyrdop katkum ki kyndon jong ka konktrak baladep ïasoi ha ka soskular.
Ka jingtohkit ka la lap ba ka tnat kam shym la knieh noh ïa ki Weighbridge lymne kam shym la leh eiei ban ïohlum ïa ka pisa kaba dang sah na ki nongwai khyrdop, kaba pynlong ba ka jingduhnoh na ka jingïohlum pisa kaba shisien shisnem ka la kot haduh T. 9.49 klur.
Ha u Nailur 2022, u Deputy Secretary in-charge Transport u la pynpaw ba ha u Kyllalyngkot, 2023 ka tnat ka la ïoh lum ïa ka pisa T. 1.38 klur na ki lai tylli ki Weighbridge, kata, ha Umling (Entry) Ri Bhoi, Umling (Exit) Ri Bhoi bad ha Killing, Ri Bhoi katba na ki lai tylli kiwei pat ki Weighbridge, kata, ha 8th Mile (Phramer), Borsora bad Bagli, ki nongwai khyrdop ki la siew tang T. 2.79. Ha kaba ïadei bad ka Majai, East Khasi Hills ka pisa kaba dang sah ym pat shym la siew haduh mynta. Hynrei, kam don satia kano kano ka jingpynshisha ba la siew ïa ka pisa da kaba pyni sakhi na ki Receipt.
Shuh shuh, saw tylli ki Weighbridge, kata, ha Wageasi (North Garo Hills), Ratacherra (East Jaiñtia Hills), Tikrikilla (West Garo Hills) bad Masighat (South Garo Hills) kim pat treikam satia (Kyllalyngkot, 2023) wat hadien 10-11 tylli ki bnai ba ladep ïasoi ïa ka soskular watla kine ki Weighbridge ki la dei ban pyntreikam noh hapoh lai bnai naduh ka sngi ba ladep ïasoi ïa ka soskular.
Wat hapdeng ka jingpynkheiñ jong ki lai ngut ki nongwai khyrdop, ka tnat Transport kam shym la pynduh satia ïa ka kontrak lymne ai dak iong (blacklisted) ïa ki katkum ki kyndon ba la ïasoi ha ka soskular lymne ban knieh noh ïa ki Weighbridge bad aiti pateng sha kiwei pat ki nongwai kiba la thep kham heh ïa ka dor.
“Ka jingbym lah jong ka tnat Transport namarkata ka la wanrah ïa ka jingduhnong na ka jinglum pisa kaba shisien shisnem haduh T. 10.13 klur na kine ki nongwai khyrdop,” ong u CAG.
Ha kajuh ka por, ka kaiphod ka la ong ba ka jingbym treikam jong ka CoT ban pynthikna ïa ka jingpeitngor ïa ki ar tylli ki Weighbridge ka la pynshlur ïa ki nongwai khyrdop ban ym lah ai jingkheiñ ïa ki trok kiba ïaid lyngba jong ki Weighbridge, bad kane ka la pynlong ban duhnong na ka Weighment Fee kaba kot T.2.44 klur.
Ka jingbishar ïa ki Record ha u Nohprah 2021 ba la aiti da ki nongwai khyrdop sha ka Ophis jong u CoT ka la pynpaw ba ha ki snem 2019-20 bad 2020-21, haduh 1,41,575 tylli ki trok ki ïaid lyngba ka Amsarin bad Majai Weighment Gates (35,241 bad 80, 862 tylli ki tok hapdeng ki snem 2019-20 bad 514 bad 24,958 tylli ki trok hapdeng ki snem 2020-21).
Ka jingtohkit kaba la bishar bniah ïa ki jingbuh jingthoh jong ki ar tylli ki Weighment Gate bad ki Check-gate jong ka Land Customs Stations (LCS) kiba don ha kajuh ka surok la lap ba ka jingdon jong ki trok kiba thew ïa ki jingkit na kine ki Weighbridge katkum ka CoT Record ki duna bha haba ïajunor bad ka jingdon jong ki trok ba la ïoh jingkheiñ katkum ka jingbuh jingkheiñ da ka LCS kaba long haduh 2,43,656 lak tylli ki trok.
Ka Rule 9 jong ka Rule ka kdew ba manla kawei ka Weighbridge kynthup ruh ïa ka Private Weighbridge ba la ai jingbit da ka Sorkar ki dei ban don ïa u Enforcement Inspector u ban peit bad pynthikna ba yn ym don kawei ruh ka kali kaba kit pud katkum ka jingkheiñ ba la buh da ki bor pynïaid hapoh ki kyndon jong ka aiñ na ka por sha ka por bad kiba pynkheiñ ïa ki kyndon kin shah daiñ kuna katkum ka Section 194 jong ka Motor Vehicles Act.
Hynrei, ka Audit kam shym la lap satia ïa kino kino ki jingpynshisha ba la buh jingthoh na kine ki ar tylli ki Weighbridge ïa kiba la peit da ki Enforcement Inspector katkum ba la kdew ha ka Rules, la ong ka kaiphod.
Nalor ba ka Sorkar ka la mad ïa ka jingduh khajna, ka jingbym ïoh jingkheiñ ïa ki trok kiba ïaid lyngba na ki Weighment Bridge ka pynpaw ba ka tnat Transport ka la phiel ban peitngor ïa ka leit ka wan jong ki trok kiba kit palat pud bad kane ka pynduh noh ïa ka jingthmu ban buh ïa ki Weighment Bridge, ong ka kaiphod CAG bad bynrap ba ka daw ba ïadei bad kane ym pat ïoh pdiang satia na CoT.
