Khliehriat Jymmang 27: Kum shi bynta ban kyrshan ïa ka jingpynkhuid ïa ki jaboh jabaiñ bad ki jingpyrshang ban wanrah ïa ka khuid ka suba, hynne ka sngi nyngkong la aiti ïa ki trok kit ñiut ba la bei pisa na ka District Mineral Foundation (DMF) Funds na ka bynta u snem mang tyngka 2024-2025 sha ka shnong Khliehriat West bad Lad Rymbai ha ki jingialang ba la long ha Community Hall Khliehriat West bad Community Hall Lad Lad Rymbai Datsimpeiñ.
Ha kane ka sngi aiti ha Khliehriat West la don lang u Myntri sorkar uba dei ruh u MLA ka thaiñ, u Bah Kyrmen Shylla kum u Kongsan ha ryngkat ka jingdon lang u Deputy Commissioner, East Jaiñtia Hills District u Shivansh Awasthi, IAS, Sub-Divisional Officer, SDO)- Hills Kumar, East Jaiñ, East Jaiñtia, Rymbai-Khliehriat MDC Kong Violet Lyngdoh, Principal Jaiñtia Eastern College, Dr. P. Nongtdu, ki khlieh nongsynshar tynrai bad ki nongshong shnong ka thaiñ.
Haba kren ha ka jingïalang, u bah Kyrmen Shylla u la pan ïa ka jingiatreilang na baroh ki nongshim bynta khamtam na ki nongïalam shnong halor ka mat kaba ïadei bad ka jingpynkhuid ïa ki jaboh jabaiñ ha kaba u la ban jur ruh ïa ki bor shnong jong ka Khliehriat West ba kin pyndonkam hok ïa kane ka trok kit ñiut na ka bynt ka jingshakri ban wanrah ïa ka khuid ka suba ha sor Khliehriat.
U Myntri u la kren ruh halor ki kam pynroi bapher bapher ba la shim da ka sorkar ha East Jaiñtia Hills, ha kaba u la pyntip ruh ba ka sorkar ka la mynjur ïa ka projek na ka bynta ban shna ïa ka surok kaba pyniasoh ïa ki jaka jong ki San Shnong ka East Jaiñtia Hills sha Shkentalang ha West Jaiñtia Hills ha ka jinglut ka ban kot T.125 klur bad ka ban kyntiew ïa ka khaïi pateng bad ki kam jngohkai pyrthei ha kane ka thaiñ.
U Deputy Commissioner & Chairman ka DMF Trust East Jaiñtia Hills District, u Shivansh Awasthi, IAS ha ka jingkren u la pynpaw ka jingkyrmen ba da ka jingaiti ïa kane ka trok kit ñiut kan iarap shibun ha kaba ïadei bad ka mat ka jinglang jaboh ha Khliehriat khamtam ha ki jaka ïew.
U la ong ruh ba ka ophis jong u ka dang wad badtwad jingmut ban pynmih katto katne ki jaka shna sboh kiba rit lyngba ka DMF lane lyngba ka MNREGA ha kaba ïa ki jaboh ba sngem lah ban pyndonkam ban pynkylla sboh bad ïa ki jaboh plastik yn lah ban lum bad phah sha ki karkhana cement ban bret ha ki jaka thang jong ki.
Kumjuh ha ka jingialang ha Lad Rymbai Datsimpeiñ la ïa don lang u MLA ka thaiñ u Bah Kyrmen Shylla, Deputy Commissioner, East Jaiñtia Hills u Shivansh Awasthi, IAS, Sub-Divisional Officer (SDO)-Sadar, East Jaiñtia Hills District, M. Kumar, IAS, Rymbai-Khliehriat MDC kong Violet Lyngdoh, ki nongïalam shnong bad ki nongshong shnong ka thaiñ Lad Rymbai.
