Ïoh ka Mawkhar sa 5 tylli ki CCTV na ka Shillong Municipal Board, ai khublei u Acting RS

Shillong, Nailur 02: Ka Dorbar Shnong Mawkhar hapoh ka jingïalam jong u Acting Rangbah shnong u Bah Ransom Sutnga ka la ïoh sa 5 tylli ki CCTV ba la ai da ka tnat Shillong Municipal Board hapoh ka jingpeit jong u Bah F K Laloo GE ka SMB.
Ha ka jingïalang kaba lyngkot kaba la pynlong ha ïing dorbar jong ka shnong na ka liang u Bah Ransom u la ong ba kane ka dei ka jingkyrkhu kaba khraw ïa ka shnong.
“Ngi la dep don lypa kumba 20 tylli ki CCTV hapoh ka shnong bad mynta ngi la ïoh biang sa 5 tylli kane kan ïarap ïa ka shnong ha kaba ïadei bad ka jingpeit pyrman ïa ki kam sniew kiba ju ïaid lynghba jong kane ka shnong,” ong u Bah Sutnga.
U la pynpaw ruh ka jingngewkhia ha kaba ïadei bad ki jingroi jong ki kam sniew khamtam kiba dih drok ha kane ka thaiñ bad kane ka jingbuh ïa ki CCTV kan long kawei na ki lad ban tehlakam ïa ki kam sniew ha kane ka thaiñ.
“Ngi la dep mad ïa kiba bun ki jingsniew ha kine ki sngi na ka daw jong ka jingkynrei jong u drok bad na ka linag ka shnong ka pynpaw ïa ka jingai khublei ïa ka tnat Shillong Municipal Board kaba la aiti ïa ki 5 tylli ki CCTV sha ka shnong kaba dei ruh lyngba ka skhim Smart City
Ha kaba ïadei bad kane na ka liang jong u Bah F K Laloo u la ong ba kine ki cctv ki dei na ka bynta ki shnong ha sor, bad dang sdang mynta, bad bun na ki shnong ki la ïoh ïa kine ki lad jingïarap.
La ong ruh ba ïa kine ki CCTV hap ban peit hi da ka shnong ban maramot ha ki sniew.
Ha kaba ïadei bad kane na ka liang jong ka dorbar shnong ka pynpaw ïa ka jingai khublei ïa ka sorkar bad kumjuh ïa ka SMB ba ka la nohsynniang ïa kane ka projek lyngba ka smart City.
Na ka liang ka shnong ka la pynpaw ruh ba ka la dep ban don kumba 20 tylli ki CCTV bad mynta la ïoh sa 5 tylli baroh mynta na ka liang ka shnong ka la don kumba 25 tylli.
Ha kaba ïadei bad kane na ka liang u Bah Ransom Sutnga u la ong ba na ka daw jong ka jingkynrei pat u drok na ka liang ka shnong ngi kwah ban pynkhlaiñ ïa ka jingpeit pyrman. “Ngi kwah ban don 2 tylli ki control room, na ka liang ka shnong ngin pyrshang ban pynlut ha kaba ïadei bad ki wireless system. Lyngba ka CCTV kan ïarap lyngba ka apps ngi lah ban peit bad ban khmih ïa kino kino ki jingjia. Ngi pynpaw ïa ka jingkmen halor kane ka jingai jingmyntoi. Na ka liang ka dorbar shnong ka don la ki jong ki kyndon haba ïadei bad ki kam sniew kiba jia ha ka shnong kum ka kam khaïi bad die drok. Haba ïadei bad kiba die madan watla ka shnong kam ithuh hynrei ka don pat ïa ki jingtip ba bniah nadong shadong namar kidei kiba nabar shnong bad lada ki leh eiei kin pyntip beit sha ki Rangbah Shnong. Lada ngim don ïa ka system ka shnong ka la shah tyllep ha ki kam sniew,” ong u Bah Sutnga.
Na ka liang jong u Bah Laloo pat u la ong ba ki la don kumba 48 tylli ki Shnong kiba la kynthup lang hapoh ki smart City. Ka Central control room ka don ha new Shillong Mawdiang diang na ka bynta ki rukom pynïaid ïa ki CCTV ha Nongbah Shillong.
La ong ruh ba ïa ka Smart city skhim la ai da ka Sorkar lyngba ka SMB bad ka shnong kan hap ban don ka jingkitkhlieh bad dei halor kane ba ka shnong ka kwah beit ban don ki CCTV.