Jowai, Nohprah 05: Ïa ka Additional Office Building kaba dang shu dep tei thymmai jong ka Jaiñtia Hills Autonomous District Council (JHADC) la plie paidbah mynta ka sngi da u kongsan u ma Thombor Shiwat uba dei u Chief Executive Member ka Council haka jingïalang ba la pynlong ha khrum jong katei hi ka ophis.
Ïa kane ka Building la tei haka jinglut kaba 3 klur 38 lak tyngka tam da ka jingïarap pisa jong ka sorkar kmie lyngba ka skim Special Assistance Grant (SAG) ïa kaba la sdang ban pyntreikam naduh u snem 2020 bad ka jingtrei kala ïaid kumba 2 snem 11 bnai, ka jingïoh ïa katei ka Building kala long ka jingjop ba khraw ïa ka Council khamtam ban ai jingshikri ïa ki paidbah ka Ri-Lum Jaiñtia.
Kane ka ïing ophis kaba long haka G+3 Building kan don ki kamra kumthup na ka bynta u CEM, Dy. CEM ki Dkhot EC ki Secretary bad ka Conference Room ban pynlong ïa kino kino ki jingïalang jong ka EC nalor kiwei de.
U ma Thombor Shiwat haka jingkren ha kane ka sngi ula ai khublei ïa baroh kiba don bynta ban pyndep ïa kane ka Building kumba ka long haduh mynta, ula pynsngew na ka liang ka EC kala wad ki lad ki lynti na ka sorkar jylla ban pynïoh ïa ka tulop kaba dang sah jong ki nongtrei ka Council da kaba ap hapoh jong une u snem.
Ula pynpaw ka jingsngewdiaw halor ka jingbym wan lut ki nongtrei ka Council sha kane ka jingplie ïa ka Additional Office Building na ka daw ka jingduh tulop jong ki, ula ong ba naduh mynta ka sngi na ka liang ka EC kan shim katkum ka bor ban pynpynbeit noh ïaka rukom treikam ki nongtrei haki tnad treikam bapher pabher hapoh ka Council.
Ula ong ba ki don ki nongtrei kiba shim kabu ban ïalam bakla ïa ka Council halor ka jingduh tulop, da kaba kyntu ba kim dei ban ïalam bakla namar ka Council kala pyrshang ban wad ki lad ki lynti ban pynsngew sha ka sorkar lyngba ka bhah kaba ki dei hok ban ïoh.
“Ngim kwah ban leit sha u paidbah hapdeng ka jingduh tulop ka Council khamtam haka por Election bad la kumno kumno ka tulop ka dei ban ïoh lut hashaw ban poi ka samoi jong ka Election MDC” ong CEM.
U Pasmon Dkhar ula ong wat hapdeng ka jinghiran jong ka pisa hynrei daka jingïatrei lang jong baroh ki MDC kila lah ban synñiang lang haka ban tei pyndep ïa kane ka Additional Office Building bad la lah ban plie ïa ka mynta ka sngi. U kyrmen lyngka ka jingïatreilang jong baroh yn sa lah ban pyndep noh ïa baroh ki projek kiba dangsah jong ka Council.
U ma Lasky Rymbai Deputy CEM haka jingkren ula kyntu ïa ki para MDC ban wanrah lang ïa ki jingmut ba bha na ka bynta ban kyntiew ïa ka District Council, ula ong baka Executive Committee kala trei shitom met bad mynsiem naduh bala shimti u ma Shiwat ïaka kam CEM.
Hadien ka jong kane la don ka jingplie ïa u maw nongrim jong katei ka ophis bad ban ot ïa u ribon da u ma Thombor Shiwat, ïa ka jingïalang la pynïaid da u ma Dikil Pohchen ACE, katba ïa ki kyntien ai khublei la ïoh na ka kong Barcelona Bamon Secretary EC.
