ïoh jingmyntoi paidbah bad kiba duna dkhotmet ha ka Mega Health Camp-cum-Awareness programme ha Nolikata HSS, Ranikor

Mawkyrwat, ‘Nailar, 20: U Justice Sanjib Banerjee, u Chief Justice jong ka Meghalaya High Court uba long ruh u Patron-In-Chief, Meghalaya State Legal Services Authority (MSLSA) ha ka sngi saitjaiñ jong ka taïew u la plie pyrda ïa ka Mega Health Camp-cum-Awareness Programme kaba ïa dei bad ka National Legal Services Authority (NALSA) Schemes bad kiwei pat ki skhim sorkar kaba halor ka phang, “Bridging the Gap” kaba la pynlong ha Nolikata Higher Secondary School, Ranikor Civil Sub Division.
U Justice Sanjib Banerjee, Chief Justice jong ka Meghalaya High Court haba kren ha ka jingïalang u la ïaroh ïa ki nongpynïaid kiba la pynlong kum ïa kane ka prokram ka ban ai jingmyntoi ïa kito kiba dei hok ban ïoh jingïarap bad ba kin tip ïa ki hok jong ki. U la ong ba hapdeng ka jingkiew bad ka roi ka par ha kine ki 76 snem, hynrei dang don shibun kiei kiei kiba kim pat lah ban pynduh kum ha ka liang ka koit ka khiah, ka pule puthi bad ka don ruh ka jingïapher hapdeng ki briew kiba ‘riewspah kiba sah ha ki jaka sor bad kito ki briew kiba duk kiba don ha ki thaiñ nongkyndong. Shuh shuh u la pyntip ba ka sorkar ka la mang ïa ki skhim na ka bynta ka jingmyntoi jong ki briew kiba donkam shisha ka jingïarap hynrei namar ka jingbym tip, kiba bun na ki skhim bad program ki bym shym la lah ban pyntreikam la hap ban pynphai noh.
U la pynshlur ïa ki briew ban leit wad ïa kiba kum kita ki skhim lyngba ki department bapher bapher bad ha kajuh ka por ula ai jingmut bad hikai ïa ki kynthei ba kim dei ban shu sngap khlem da ujor sha ki bor ba dei peit lada ki shah leh tohmet lada dei ha ka met ne ki jingmut jingpyrkhat. Ha kajuh ka por u la kyntu ïa ki khynnah ban kiar na ki jingmlien ba sniew bad ban ym ngop ha ka bor jong u drok.
Namarkata, u la hikai bad ai jingmut ïa ki khynnah skul ban sam lem ïa ki jingnang jingtip ha ki shnong ki thaw khnang ba ki briew kin tip ïa kiba kum kita ki lad jingïarap kiba ïa dei kham, tam bad ka koit ka khiah bad ka pule puthi. U la ïathuh ba la thaw ïa ka National Legal Services Authority (NALSA) hapoh ka Legal Services Authorities Act, 1987 da ka jingthmu ban pynsngewthuh ïa ki briew halor ki hok kiba ki dei ban ïoh bad ban pynthikna ba kiba kum kita ki briew kin ym duh ïa ka hok jong ki.
U Justice W. Diengdoh u la ong ba ka jingthmu ba kongsan jong kane ka prokram ka long ban pynsngewthuh paidbah halor ki lad jingïarap ba ki dei ban ïoh kum ki nongshong shnong bad lyngba kum kane ka jingïalang kan long kum ka jingkieng ka ban kdew lynti ban ïoh kum kita ki lad jingïarap ha ka por ba ki donkam. U la ong ba ka sorkar ka la mang bun ki skhim kum ka skhim 100 sngi ne MGNREGS, ka PMJAY, National Rural Livelihood Mission kiba long ki skhim na ka bynta ban rat ïa ka jingduk jingkyrduh da kaba pynshlur ïa ki ban wan shakhmat ban shim ïa kiba kum kitei ki skhim lyngba ka jingïarap jong ki Para Legal Volunteers bad ki plidar.
U Justice H.S. Thangkhiew u la ïathuh ba ka sorkar ka la pynmih shibun ki skhim ki ban ai jingmyntoi ïa u paidbah bad ba lah ban ïoh lyngba ki department bapher bapher kum na Social Welfare Department, Veterinary, Education, PMAY, MHIS, Agriculture etc.
U Dr. F.R. Lartang, District Medical & Health Officer, South West Khasi Hills District u la batai bniah halor ki skhim kiba ka health department ka ai.
Hadien kane u Justice Sanjib Banerjee, Hon’ble Chief Justice, High Court ka Meghalaya & Patron-In-Chief MSLSA u la sam ïa ki tiar jingïarap Assistive Devices sha ki briew kiba don jingduna ki dkhot met.
Ki lad jingshakri kiba la ai ha kane ka Mega Camp ki kynthup ïa ka Health Check Up & MHIS Enrolment, Aadhaar and Epic Card Registration, E-Shram Registration, Labour Department Scheme, Agriculture/Horticulture Scheme, Food & Processing Units, Tourism, Commerce & Industries, Fisheries, Social Welfare bad kiwei pat ki skhim sorkar.
Ïa kane ka prokram la pynlong da ka Meghalaya State Legal Services Authority (MSLSA), Shillong ryngkat ka jingïatreilang bad ka ophis District Legal Services Authority (DLSA), Mawkyrwat, ka Sub Divisional Officer (C) Ranikor, Ranikor Civil Sub Division ha ka jingïadonlang u Justice H.S. Thangkhiew, Judge ka Meghalaya High Court & Executive Chairman MSLSA, u Justice W. Diengdoh, Judge ka Meghalaya High Court & Chairman High Court Legal Services Committee, u bah T. Lyngwa, IAS, Deputy Commissioner, South West Khasi Hills District, Mawkyrwat bad kiwei kiwei.
Kham ha shwa, u bah M. Skhemlon, MHJS, District & Session Judge-cum-Chairman, DLSA, South West Khasi Hills District, Mawkyrwat u la ai ïa ki kyntien pdiang sngewbha katba u bah T. Lyngwa, Deputy Commissioner ka South West Khasi Hills District u la ai ïa ki kyntien khublei. La pynkut ïa ka prokram da ka National Anthem ba la ïalam da ka Meghalaya Police Cultural Troupe.