New Delhi, Nohprah 14: Ka jylla Meghalaya ka la shah pynkup burom da ka kyrdan kaba ar ha kine ki arsnem kynthih ka la poi ioh biang ha ka kyrdan kaba ar ha ka Group-D category na ka bynta ka khusnam National Energy Conservation Award halor ki jingpyrshang jong ka ban kyntiew ïa ka jingpynbiang ïa ka bording, ka jingpynduna halor ka jingpyndonkam ïa ka bording.
Ïa kane ka jingsam khusnam la pynlong da ka Bureau of Energy Efficiency, Ministry of Power, Government of India, kaba la ithuh ïa ka jingpyrshang ka jylla Meghalaya ban kynjoh sha ka jingdonkam ban ïada ban kunai ïa ki kam bording.
Ha kane ka jingai khusnam ki heh ki haiñ kiba kynthup ïa u Jagdeep Dhankhar, Honourable Vice President ka ri India bad u Shripad Naik, Hon. Union Minister of State, Ministry of Power ki la donlang bad ki la sam ruh ïa ki khusnam sha ki jylla ba la ithuh ïa ki jingnoh synniang ha kaba ïadei bad ka jingpynbha ïa ka kam bording.
Ha ka jingkren u Vice President ka ri India u la ïaroh ïa baroh ki jylla ba ki la noh synniang bad ban pynneh pynsah bad ka jingpynlang ïa ka bording sha ka national energy conservation bad kumjuh ruh halor ki thong jong ka.
U Myntri ka tnat Bording ka Sorkar sorkar jylla u Abu Taher Mondal u la ong ba ka sorkar ka la sdang bun ki kam ban pynlang ban kunai ïa ka bording, kaba kynthup ruh ïa ka jingpynduna ban pyndonkam ïa ka bording, ban pynlut ruh ha kaba ïadei bad ka jingpynthymmai ïa ka bording, ban pyndonkam ïa ki teknoloji kiba katkum ka juk mynta, bad ka jingpynbna ïa ki rukom treikam ha kaba katto katne ki la poi sha ka jingpynbna kaba khatduh. Kine ki jingsdang ki la long kum ki jingnoh synniang ban pynduna ïa ka jingbam palat jong ka bording.
U la ai khublei ïa u Myntri Rangbah ka jylla u Conrad K Sangma uba la ai ka jingkyrshan kaba khlem sangeh sha ka tnat Bording. Haba ïaroh ïa ki nongpyndonkam bording ba ki la pyrshang ban shim ïa ki sienjam ban pynduna bad ban pynlang ïa ka jingpyndonkam ïa ka bording ha kiba bun ki sienjam, u Myntri u la ong ba kane ka khusnam ka la long kyrpang hapoh ka State Energy Efficiency Index, ha ryngkat bad ki rukom pynïaid kam bad ki kam ba la trei kiba ïadei bad ka jingpynneh pynsah ïa ka bording kiba la pyntreikam ha kiba bun ki bynta, kum ha ki karkhana, transport, municipality, building, cross sector bad MePDC.
Shuh shuh u Myntri ka Bording u la pynpaw ba ka sorkar ka la pynbna ruh ïa ka Meghalaya Energy Conservation Regulation 2017, kaba thmu ban kyntiew ïa ka jingpyndonkam ka BEE star-rated appliances ha ka jingpynlut kaba long na ki paidbah bad khang noh ïa ka jingpyndonkam ïa ki incandescent lamp bad magnetic-wire choke ha ki tube light ki bym biang. U la ong ba ka sorkar ka la thaw ïa ka state-level steering committee ban ithuh ïa ki key pillar jong ka jingïaid ka bording hapoh ka kyrdan jong ka jylla. U la ïathuh ruh ba ka sorkar ka la pyllait ïa ka Meghalaya Electric Vehicle Policy 2021, ha kaba 15% jong ka state’s motor vehicles ba la pyndonkam da ki electric battery ha u snem 2025.
U Sanjay Goyal, IAS, Commissioner and Secretary, Power Department, ka sorkar jylla u la ong ba kane ka jingïoh jingithuh ka pyni ïa ka jingshim khia ka jylla ha kaba ïadei bad ki kam jingtei bad ki kam pynbha hapoh ka tnat bording. Ka jingthmu kam dei tang ban kynduh ïa ka jingdonkam ha ka bording jong ki nongshong shnong hynrei ruh kumjuh ban pynshong nongrim na ka bynta ban kyntiew ïa ki kam shakri kiba shaniah na ka bynta ka bording kaba neh kaba long ruh na ka bynta ka jingkiew bad jingïaid beit ha baroh ki jaka jong ka thaiñ.
U la kdew ruh ba ka Demand Side Management Cell la dep ban thaw hapoh ka MePDCL (Meghalaya Power Distribution Corporation Ltd) da ka jingïarap ka Bureau of Energy Efficiency, New Delhi, ban thaw ki lad halor ka business model kaba biang ban pyndep ïa ki kam hapoh ka DSM. U la ong ruh ba ka MePDCL ka la shim bun ki sienjam ban pynduna ïa ki jingduhnong hapoh ka T&D, bad kumba ka long mynta ka percentage jong ka T&D loss ka long 17.53%.
