Shillong, Nailar, 11: Ha ka jingpyrshang ban pyntbit ïa ki samla pule na ka bynta ka lawei jong ki ha kaba ïa dei bad ka kamai kajih, ka AVENUES, Shillong, ka la pynlong ïa ka prokram ‘Improving Employability on Campuses: Foundation in Career Skills’ lyngba ka FastFORWARD initiative jong ka, ryngkat ka jingïasnohkti lem jong ka Lady Keane College, Shillong. Ha kane ka sngi, palat 80 ngut ki khynnah pule, kiba kynthup ïa ki ba la pass, na ka Bachelor of Computer Applications (BCA) Department jong ka kolej ki la ïoh ban kheit ïa u soh ka jingjop na kane ka prokram.
Ka jingthmu jong kane ka prokram ka long ban ai training ïa ki khynnah samla pule ha ki kolej ha ka liang ki soft skill lyngba ki workshop ba ai jinghikai ha ka jingshlur (Confidence), ka rukom pyrkhat shai ïa ka lawei (Clarity), ka rukom pynïadei bad kren para briew (Communication) bad ka jinglah ban ïaid shaphrang lyngba ki jingeh bad jingïakynduh bapher bapher (Emotional Resilience). Kine ki jinghikai ki ïarap ban pynksan shuh shuh ïa ka pule puthi ba ki ïoh na ki skul bad ki kolej, ban pynkhreh ïa ki shwa ba kin sdang wad kam wad jam bad sdang trei sdang ktah ha kano kano ka lain ba ki hi ki jied.
Ha ka jingkren jong u ha ki khynnah samla jong kane ka college, u Dr. D. K. B. Mukhim, uba long u Principal, u la ong kumne, “Ka long kaba kongsan ban kynmaw ba ngi dei ban wad ïa ki jingsneng ha ki jingbakla jong ngi khnang ban ngin ym leh biang ïa kajuh.” U la pynpaw ïa ka jingsngewnguh sha ka kynhun AVENUES kaba la pyntreikam ïa ka prokram naduh kaba sdang haduh kaba kut. U la pynkut da kaba ong kumne, “Nga ngeit skhem ba ki khynnah jong ngi ki la ïoh ïa ka jingsngewskhem jingmut ban ïaid shaphrang sha ka thong bad ka lawei jong ki.”
Ka samla Bashisha Thabah, 3rd Semester, ka la kren shaphang ba kumno ki jinghikai bad jingtbit kiba ki la ïoh lyngba kane ka prokram ki ai mynsiem bad jingkyrmen ïa ki khynnah ba kin beh sha la ki thong jong ki. Ka la ong kumne, “Kawei na ki jinghikai kaba nga sngewtynnad bha ka long ba lada ngi long ki briew kiba don ka jingmut jingpyrkhat kaba shai, bad lada ngi kloi bad thrang ban wad jingnang-jingstad, ngin long kita kiba la pynkreh ban ïoh mad ïa ka jingjop.” Ka la pynshlur ruh ïa kiwei ki khynnah samla ban ym kynran dien bad ban don ka jingngeit bad jingshaniah kaba pura halor ki sap kiba ki don.
Ka samla Fancy Mylliem Umlong, ba la pass na kane ka college ha ki snem ba la dep, ka la ong kumne, “Ki prokram kum kine ki ïarap bad pynkreh ïa ngi ki khynnah samla ha kaba ïadei bad ka lawei jong ngi. Nga ngeit ruh ba baroh na ngi ngin ïoh ban mad ïa u soh jong ka jingjop.”
Lah ban ong ba ka AVENUES ka ju ai ïa kum kine ki Soft Skills bad Career Readiness training ha ki samla kylleng satlak ka jylla Meghalaya bad shatei lam mihngi jong ka Ri India mynta la palat 19 snem, ha kaba palat 100,000 ngut ki samla kynthei bad shynrang ki la lah ïoh jingmyntoi.
