Jowai, Nailur 29: Ka Ophis jong ka Fishery Department West Jaiñtia Hills District, ka la pynlong ïa ka jingai jinghikai (Awareness workshop Programme) kaba shisngi ïa ki Nongri Dohkha hynne ka sngi (29/09/25) ha Mookyrdup Dorbar shnong Community Hall ha kaba kumba sanphewngut (50 ngut) ki Nongri Dohkha na ki saw tylli ki CR&D Block kata Thadlaskeiñ Block, Laskeiñ, Amlarem bad Namdong Rural Development Block ki la ïawan sha kane ka jingshah hikai (training) kaba shisngi.
Lyngba kane ka jingai jinghikai kaba shisngi, ki Nongri Dohkha ki la sngewthuh shaikdar kumno ban ri Dohkha bad kaei ka jait jingbam ban ai ïa ki ba kin heh kin san bad ka ban ai jingmyntoi ïa ki Nongri Dohkha.
Ha kane ka sngi ki Nongri Dohkha kila khmihlynti ban ïoh ïa ka jingai jinghikai shaphang ka kam ri Dohkha da ka J.K. Marak, SMS, KVK, hynrei pat kam shym la wan bad ïa ka jingai jinghikai ïa ki Nongri Dohkha la ai jinghikai da u ma P.S. Suting Superintendent ka Fisheries Ophis Jowai bad u ma R. Lytan Programme Manager.
U ma P.S. Suting haba kren ha kane ka sngi ha Ophis treikam jong u, u ong ka jingpynlong ïa kane ka Awareness programme kaba shisngi ïa ki Nongri Dohkha kiba la wan na ki saw tylli ki Rural Development Block jong ka West Jaiñtia Hills District halor ka phang Ornamental Fisheries and Seed/Feed Certification. Ka jingpynlong ïa kane ka Awareness programme ka long ban pynsngewthuh ïa ki paidbah namar bun ki paidbah bad ki nongri dohkha ha West Jaiñtia Hills kim pat tip bha kiba kumno ki jaitdohkha kiba ki dei ban ri ha ki Nan bad ki Pungdohkha jong ki bad kaba ka bam jong ki Dohkha kaba ki nongri dohkha ki dei ban ai ïa ki.
Ha kane ka sngi Awareness Programme nalor u ma P.S. Suting Superintendent of Fisheries West Jaintia Hills District la ïa donlang ruh u ma R.Lytan Programme Manager, kong C. Challam Fishery Officer, ma C.Tang MSP, ma Embhahlang Lyngdoh UDA bad kiwei.
